اتشجعت ابتهال من كلام ابوها وفضلت ماسكة التليفون تكلم أصحابها وتشوف فى الجرائد على الوظائف تدور على شغل ، بس للاسف مفيش .
شعرت بالاحباط شوية ورجعت العزيمة تدور تانى اول ما سمعت صوت ابتسام وهى بتتخانق مع دبان وشها ، قالت لازم الاقي مكان اروح أقضى يومى فيه ، اتصلت بصاحبتها تسال عن اخبارها واشتغلت والا لأ ...قالت لها انها اشتغلت فترة صغيرة ومضطرة تسيب الشغل عشان خطيبها مش عاوزها تشتغل وعرضت عليها تحل محلها فرحت اوى وقالت ياريت واتفقت معاها تقابلها الصبح .
جريت على ابوها تبشره لكن تراجعت لما شافت مامتها قاعدة معاه ، فهم ابوها أن فيه حاجة عاوزة تقولها ، غمز لها عشان تروح اودتها ، وبعد شوية قام وحصل ابتهال فى اودتها قالها البسي ننزل نشترى طلبات للبيت . ماصدقت ابتهال ولبست بسرعة ونزلت مع ابوها ومعاه لستة بالطلبات ومعظمها عشان الوالدة عشان تسترد صحتها ، خبى الورقة وقال هيشترى اللى شايفة مناسب ، وهم متجهين للسوق قالت له على خبر الشغل وأنها هتحل محل صاحبتها عشان خطيبها مش عاوزها تشتغل عشان بيجهزوا والوقت ضيق ، استبشر خير وقالها بداية طيبة ، وان شاء الله تلاقي راحتك هناك ،
ابتهال : عارف يا بابا احلى حاجة انى أمينة مكتبة فى النادى ، مكان مفتوح وناس كتير .
بابا : اشتركى فى اى لعبة كمان انتى بتحبي الرياضة .
ابتهال : اه يا بابا الاحلام حلوة .
بابا : انتى صغنونة احلمى زى ماتحبي ،انتى حبيبة قلبي
لما وصلوا السوبر ماركت اشترى لابتهال اى حاجة نفسها فيها ، واشترى طلبات البيت مايكفى يومين وهو مقرر أن ابتسام ترجع بيتها فى أقرب وقت ممكن ،
فى طريق العودة ...وقفت ابتهال فى الطريق وسالت باباها
هو انا ليه يابابا مش محبوبة محدش بيتقدم ويكمل
بابا : اوعى تقولى كده انتى مفيش اجمل منك روحك حلوة ومتميزة وكمان حلوة .
ابتهال : امال بس
بابا : بلاش بسبسة أوعى تفكرى فى الموضوع ده الحكاية فيها سر ومسيرى اعرفه . ماتشغليش بالك بكرة يجى لك اللى يستحقك .
ابتهال : طب هنعمل ايه بكرة .
بابا : اااااه وقع المحظور ...مالنا خايفين من امك كده ...سلام قول من رب رحيم ..بكرة هتلاقي حل باذن الله ..المهم تستعدى للمقابلة بكرة وان شاء الله تتقبلى انتى بنتى حبيبتى 🥰
#جيهان_بركات 🥀
No comments:
Post a Comment