دخلت نامت فى اودة تانية كان كل همها تعرف حصل ايه ووائل عرف الأحداث والا لأ ، دخلت تنام وكل تفكيرها ازاى تدمر ابتهال ، تكلم نفسها وتقول انتى السبب اشمعنى انتى الكل يحبك اشمعنى انتى احلى منى ومرغوبة من كل الناس ، يسألوا عنك ويفتقدوا وجودك اشمعنى انتى ، انتى ولا حاجة .
ابتهال نسيت فى كل الاحداث دى شغلها ونسيت تتصل تعتذر عن الغياب لظروف قهرية ..
فاروق قعد مع أخته يتكلموا ويتفقوا يعملوا ايه فى الأيام إللى جاية ، قسموا بينهم الزيارة للمستشفى وشغل ابتهال وجميلة لازم حد يراعيها حسب مواعيد شغل ابتهال وزيارة المريض ، دخلت عليهم ابتهال بعد ما رضعت جميلة ونيمتها ، قالت خلاص يا بابا اسيب الشغل مش مهم ، ماما محتاجة رعاية وكمان البنت ،واضح أن مامتها استغنت عنها .
الاب : دى طالبة الطلاق من وائل وقلت له يطلقها احسن
ابتهال : ياخبر ،ماينفعش يا بابا وتيجى تعيش معانا تانى .
الاب : اه صحيح انا راح من بالى الجزئية دى ، كل همى امك ومرضها ،كده مش هينفع ترجع البيت تانى ، طيب هاشوف وائل يعمل ايه بس انتى مش هتسيبى الشغل ..وامك الله يشفيها لما ترجع البيت بالسلامة نرتب بعد كده هنعمل ايه .
الصبح نزل الاب وابتهال للمستشفى والعمة اخدت جميلة ورجعت بيتها .
فى المستشفى الدكتور قالهم هى عندها جلطة فى المخ ودخلت فى غيبوبة ولما تفوق هنشوف الجلطة أثرت على ايه فى أطرافها ، اهم نقطة تفوق من الغيبوبة ، وطلب منهم أنهم يجوا فى وقت الزيارة بس ،وجودهم ملوش لازمة .
رجعوا البيت وابتهال جهزت الغدا والاب غير كالون الشقة ونزلوا ابتهال راحت الشغل والاب راح للعمة ، وقبل ما يروح قال البواب لما يشوف وائل يقوله يتصل فى بيت العمة ...
ابتهال وصلت النادى شافت كابتن ايمن على باب المكتبة خير ياانسة سالت عليكى امبارح لعله خير .
دخلت المكتبة وهو وراها وقالت له ماما دخلت المستشفى ..
ايمن : ياخبر الف سلامة خير ..
ابتهال : عندها جلطة فى المخ ( دموعها نزلت وهى بتحكى )
ايمن : ماتخافيش هتبقي بخير ..طيب مش محتاجة حاجة ،
قعدت لوحدها تبكى وتعيد الأحداث تانى وهى بتتساءل ليه بيحصل لى كده ليه اختى مش طايقانى ده احنا اتنين مفيش غيرنا ، ليه كده ؟ تكدرى حياتنا وتنغصى عيشتنا .
مسكت القلم حاولت تكتب ماقدرتش ..حاولت كتير تنسى الموقف كله بس ماقدرتش ...
انتهت الوردية ومشيت وهى على باب النادى لمحت وائل منتظرها.. دخلت النادى تانى وقالت له خير يا وائل جيت ليه.
وائل : جيت أسألك هو انتى مخطوبة لابن عمتك .
ابتهال: مخطوبة ؟ مين قال الكلام ده ، لا انا مخطوبة ولا عمرى اتخطبت ولا ابن عمتى اتكلم معايا فى الموضوع ده . غريبة ايه السؤال ده .
بص فى الارض وحكى لها وقت ما جت الخاطبة تشوف له عروسة وقلت لها عن عليكى قالت لى هتسال الأهل عنك رجعت لى بجواب من ابتسام ، انك مخطوبة من ابن عمتك وأنها مش مناسبة لك ، والخاطبة رشحت لى ابتسام وأنها احسن منك بكتير فوافقت وقلت انتى وهى من نفس البيت يبقي اكيد شبهك وماتتخيرش عنك ...
ابتهال : لا حول ولا قوه الا بالله العلي العظيم انا مش قادرة استوعب كل الاحداث دى انا مش قادرة اتحمل انا هامشى ..
وائل : استنى بابا قالى اعدى عليكى اجيبك ونروح لعمتك هناك .
وصلوا هناك وفاروق اتكلم مع وائل عشان يعرف منه عمل ايه مع ابتسام فشرح له أنه مش عارف يتعامل معاها ومش فاهم هى عاوزة ايه ، وانا اتجوزت باعمى عشان ارتاح واعيش فى هدوء واعمل عيلة بس كده مش هقدر اكمل .
وفهم الاب منه أنه قرر يطلقها بس منتظر الوقت المناسب كده ، وائل بيفكر فى السفر فى اى بلد عربي يشتغل هناك وينسى كل الاحداث دى ويبدأ حياته من جديد ويستامنه على بنته لحد ما تكبر شوية ويقدر ياخدها معاه ويربيها .
سكت الاب لانه مش لاقى رد ينفع مصدوم فى بنته وتحمل مسؤولية حفيدته وماكانش يفتكر أن الحال يوصل لكده .
رجع البيت وعمل نفس اللى عمله مع ابتسام دخل اودته وسابها قاعدة فى الصالة لوحدها وده كان بيجننها ، نفسها تعرف حصل ايه ..حاولت تستفزه عشان تفتعل خناقة لكن سكتها ومشى وقفل على نفسه الباب وقالها لو سمعت صوتك هاضربك تانى ،انا خلاص مش عاوزك .
#جيهان_بركات 🥀
No comments:
Post a Comment