كبرت وبقيت اعرف انام فى الضلمة
كبرت ومش باشتاق لحد
كبرت وعرفت اعتزل ما يؤذينى
كبرت يا امى واتعلمت الاستغناء
كبرت يا امى واستغنيت عن كل حاجة باحبها لو فيها فرهدة
كبرت وباشوف فين راحتى وأثبت فيها
كبرت وضيقت المحيط حوالى ويادوب اودتى
كبرت وأسباب سعادتى بقت محدودة
كبرت لما فهمت مليش دور وانسحبت
كبرت يا امى وأقصى طموحى يمر يوم بسلام
كبرت يا امى وانا فى حالة انتظار
كبرت على المعافرة والفرهدة والجرى ورا احبابي عشان يشوفوا حبي لهم
كبرت وبطلت اشترى ودهم وحبهم ووجودهم
كبرت وبطلت أحلم وبطلت اتمنى وبطلت أجرى ورا الدنيا
كبرت ومشيتى بقت بطيئة ومحدودة
كبرت ومش عاوزة صوت عالى بيزعجنى
كبرت وباشوف التليفزيون وانا كاتمة للصوت
كبرت ونفسي لاتشتهى الاكل والحلويات والكلمة المشهورة مليش نفس
كبرت وبطلت اروح لدكتور وبقيت باكتفى بالمسكن
كبرت وصغرت معايا دايرة الاصحاب والأهل
كبرت يا امى ومابقتش اجتماعية ولى أصحاب ومعارف فى كل مكان
كبرت يا امى وانا باتفرج على الناس وهم بيجروا ورا الدنيا ومكسلة اقولهم أهدوا شوية
كبرت يا امى وانا اعشق الحدود ...حدود سعادتى حدود معامالاتى حدود اهتماماتى حدود حتى الالم .
كبرت يا امى وفهمت انى اتولدت باسم وهينتهى بانى مجرد جثة
كبرت يا امى ومشيت كتير وعافرت وانا فاكرة انى باحقق اهدافى ومافهمتش انى عشت عمرى لآخر انفاسي.
كبرت يا امى وفهمت انى لازم ازين قبرى زى ما ازين بيتى .
كبرت يا امى انى اقلل احتياجاتى مع الآخرين لأنهم بيتحولوا
كبرت يا امى وعرفت أن زمنك غير زمنى غير الزمن ال جاى .
كبرت يا امى أن مش مهم الشهرة والنجاح والفلوس والعيال والبيوت و و و لهم اى قيمة من غير رضى ربنا
كبرت يا امى وعرفت أن الحياة ببساطة جوة محيط حياتك وجدران بيتك وجوة عقلك وقلبك هى دى العيشة الحقيقية .
كبرت يا امى
