ابتسام عملت شبورة كبيرة عشان مش عاوزة تحكى على اللى حصل لأمها ،مش عاوزة تعترف انها السبب ، وأنها كانت هتموت ابتهال .
وائل نزل جرى على بيت فاروق عشان يحكى له شاف الجارة واقفة فى الشباك شايلة جميلة ، احتار هى ليه بنتى عند الناس ، اول ما شافته نزلت على السلم تقابله ، شفت اللى حصل يا ابنى حماتك فى المستشفى جبنا لها الإسعاف أجرى شوفهم وطمنى
وائل وقف مش فاهم حاجة ، ومش عارف يتصرف ازاى .
الجارة : روح يا ابنى بنتك معايا فى امان روح بس المستشفى فى الميدان بره روح وطمنى .
جرى بسرعة وهو نفسه يفهم حصل ايه ، لقى ابتهال منهارة من العياط وفاروق واقف مصدوم وزعلان اوى والعمة وابنها جنبه يصبروه ..
وائل : حصل ايه ماما فين حد يفهمني انا تعبان مش فاهم حاجة ..
العمة : أهدى ياابنى تعالى افهمك عمك مش قادر يتكلم ...
وقفوا على جنب وحكت له كل التفاصيل وان الدكتور قال إن ام ابتسام راحت فى غيبوبة مش عارفين هتفوق امتى وغالبا جت لها جلطة فى المخ .
وائل : لاحول ولاقوة الا بالله العلي العظيم لاحول ولاقوة الا بالله العلي العظيم.. ليه كده ليه ؟ انا خلاص مش قادر اتحمل انا تعبت تعبت ..
العمة : أهدى ياابنى مفيش منه فايدة الانفعال .
وائل : ياعمتى اللى انا فيه كتير على ، الهانم بعد ما عملت كده فى امها فى منتهى الجبروت جاية تطلب الطلاق وبتقول كلام فارغ وكلام مايصحش يتقال ، عمرى ماشفت حد بالسواد ده .المسكينة ابتهال عملت فيها ايه عشان تعمل كده ..رحمتك يا ارحم الراحمين .
راح لعمه طبطب عليه ويصبره ، بكرة طنط تقوم بالسلامة وتطمن عليها
الاب : الحمدلله ياابنى قدر ولطف ربنا يشفيها ويعافيها ..
فضل واقف معاهم بالساعات لحد ما جت الممرضة لو سمحتوا اتفضلوا مفيش زيارة دلوقت تقدروا تيجوا بكرة تطمنوا على المريضة
ابتهال رفضت وقالت مش هامشىى من غير ماما . أشفق عليها فاروق بعد كل اللى عملته فيكى بتعيطى عليها وصعبانة عليكى .
أخدها فى حضنه يطمنها ياللا يابنتى ملهاش لازمة قعدتنا تعالى نرجع البيت نشوف هنعمل ايه بكرة.
رجعوا البيت ومعاهم وائل ، اتصدم فاروق من منظر الصالة والتليفون مرمى على الأرض والسجاد ملعبك على جنب ، بص ل ابتهال وقالها واضح انها خناقة كبيرة .
سكتت وماعرفتش تتكلم . فجأة افتكرت جميلة جريت على شقة جارتها اخدتها منها واعتذرت لها انها سايتها كل الوقت ده افتكرت أن أمها هتاخدها .. استغربت الجارة وسألتها هى ابتسام ماكانتش معاكم ، سكتت ابتهال ترد وتقول ايه ، فهمت الجارة أن البنت قسوتها وجبروتها وصل حتى للام . معلش يا بنتى لو احتجتى حاجة قولى لى والف سلامة لماما ..
دخلت سمعت وائل بيقول لابوها على كلام ابتسام ، رد الاب بمنتهى الاسى والخجل من بنته قاله طلقها يا ابنى بنتى هتسود عيشتك ، وانا باقولك مش عاوزين اى حاجة دى ماتستاهلش وشوف لك بنت تانية تصونك وتحترمك ،
استغرب وائل وزاد اندهاش من كلام الاب انت للدرجة دى معندكش امل فى إصلاح بنتك ..
الاب : بنتك يا ابنى معانا شوفها وقت ماتحب ، ولو عاوزها خدها محدش هيعترض ..
نزل وائل وهو مصدوم ومش عارف يستوعب ومش عارف يعمل ايه فى المجنونة دى .
رجع البيت وهو مش قادر يتكلم ومش عارف يتعامل معاها ازاى ،
ابتسام قاعدة فى الصالة متحفزة لخناقة جديدة , مش قادر يبص لها ولا يسمع صوتها .
صرخت فيه انت رايح فين ؟ هو انا هوا مش شايفنى
وائل : انتى ايه معندكيش دم ولا احساس ابعدى عنى روحى بيت أهلك مش طايقك ابعدى عنى .
#جيهان_بركات💔
No comments:
Post a Comment