خرجت ابتسام من المستشفى على بيت الام عشان ترعاها .. وبدأت تظهر مشاكل فى الرضاعة وفشلت فى ارضاع البنت ونزلت ابتهال بالبنت لدكتور اطفال وكان معاها وائل زوج ابتسام وهى كانت تعبانة من أثر العملية .
الدكتور كتب للبنت لبن صناعى وفهم ابتهال التطعيمات وتعمل مع البنت ايه وتتعامل معاها ازاى فى الرضاعة ومواعيدها وكل كلامه على اساس انها الام نظرت ل وائل بحزن وسكتت ورفضت تصلح المعلومة للدكتور ، بس هتعمل ايه لما ابتسام تيجى له بالبنت لما تخف فقالت فى نفسها هافهمه المرة الجاية .رجعت البيت وقعدت تفهم ابتسام الكلام اللى قاله الدكتور ماحاولتش تسمع ولا تفهم وشخطت فيها انا تعبانة ابعدى عنى ..
جت الام تشوف فيه ايه اخدت جميلة من ابتهال وبتحاول تفهم فيه ايه لكن ابتهال من الزعل سابتهم ونزلت الشارع وهى مش قادرة تتنفس .
وائل وهو راجع من الصيدلية لمح ابتهال من بعيد جرى عليها وهو مندهش .
فيه ايه يا ابتهال ؟
ولمح دموع مغرق وشها اتخض اكتر
فيه ايه مالك فى حاجة حصلت ؟ جميلة ،
لحقته وقالت له جميلة بخير مفيش حاجة اطلع لهم عشان ماما تعمل الرضعة جميلة جعانة .
وائل . طيب ماشى بس انت بتعيطى ليه ..طب بصى هاطلع الحاجات ل طنط وانزلك اوعى تمشى .
طلع وائل وهو مش فاهم حاجة .وقبل ما يتكلم سمع ابتسام بتصرخ فى امها ابعدوا عنى انا تعبانة مش طايقة حد خدى البنت دى معاكى مش طايقة اسمع صوتها .
خرجت الام الصالة شافت وائل انزعجت ماكانتش عاوزاه يسمع الكلام ده ..مد ايه بالشنطة وقبل ما يتكلم قالت له معلش نستحملها شافت كتير على ماولدت معلش نستحملها .. تظاهر أنه زعلان ومضايق وقالها انا نازل يا طنط ارجع البيت ولو احتجت حاجة كلمينى اجى لكم على طول عن اذنك ..
نزل جرى يلحق ابتهال هو خلاص فهم سبب ضيقتها وزعلها سببه ايه . هو مصدوم فى العصبية دى ماكانتش موجودة قبل كده . حاول يجيب لها عذر بس مش مقتنع العصبية دى يكون لها اعذار . وسأل نفسه ياترى اخلاقها هتكون ازاى الفترة الجاية .
#جيهان_بركات 🥀
No comments:
Post a Comment