الجو اتوتر جدا فى البيت وجميلة بتصرخ ومحدش بيشوفها وابتسام واقفة مكانها فى منتهى الكبر ، والام اتفاجأت بوجود اخوها ومراته وشافوا كل ده ارتكبت ومش عارفة تصلح الموقف ، ومش عارفة تنسحب ازاى ، جريت على الاودة تشوف جميلة وائل قالها خليكى يا طنط شوفى ضيوفك وانا هشوف جميلة وهو جوة نادى على ابتسام ،ووقتها اضطرت تتحرك وتدخل اودتها عشان تتهرب من خالها واسرته .
جت ام ابتسام تقعد معاهم وتلطف الجو
قالها : هو انتى لسه بتفرقى فى المعاملة ياختى بين بناتك دول بناتك مالكيش غيرهم انسى اللى فات بقي
الام : اشمعنى أنا اتفرقت فى المعاملة طول عمره ابوكى يعاملنى وحش عشان بنت ومعندوش غير الصبيان بس واول ما يشوفنى يشتمنى ويهزانى من غير ما اعمل حاجة اشمعنى أنا ما اكملش تعليمى وادخل الجامعة زيكم هو انا قلة
الخال : يااختى ده من زمان الكلام ده وابوكى وامك الله يرحمهم رحلوا خلاص ..اللى بتعمليه مش هيرجع اللى فات ويصلحه
الام : ماهو اللى فات بيتكرر تانى ، غصبتوا على اتجوز فاروق وهو كان مغصوب على يتجوزنى ليه اعيش غصب عنى مع حد برضه مش طايقنى زى ابوك بالظبط ..ولما جبت ابتسام عمل في زى إللى ابوك عمله عاوز الولد وانا اجيبه منين وفضل يعاملنى وحش ومش طايقنى عشان جبت بنت وانا حبتها من كل قلبي عشان اضايقه وكنت مصممة ما اخلفش تانى وشاء ربنا احمل وانا مش عاوزة وجبت ابتهال غصب عنى وانا مش عاوزة اخلف وهو ياسلام طاير بها ومبسوط اوى اشمعنى ابتسام وتقولى بافرق فى المعاملة .
الخال : ممكن يكون اتفرضتى عليه بس هو اتغير وكلنا لمسنا ده وبقي بيعاملك كويس ويعامل بنته كويس وبيحب بناته الاتنين لكن انتى كرهتى الاخوات فى بعض والتفرقة دى على دماغك لوحدك .
الام : محدش له حاجة عندى انا حرة احب ابتسام اكره ابتهال انا حرة ، وهافضل جنب بنتى لحد ما تبقي كويسة وارجع وقت ما تحب محدش يفرض على حاجة تانى . ومتشكرة يا خويا على النقطة لابتسام نجاملك فى الافراح .
الخال : هى بقت كده بتطردنى كتر خيرك انا نازل وبكرة تندمى
نزل الخال وأسرته وراح لفاروق لاقاه واقف فى الشارع منتظرة ورحب به فى بيته اتفضل عندى بيتى هو بيتك اهلا وسهلا .. ابتهال بتجهز العشا .
الخال كان محرج ومش عارف يتكلم من تصرفات اخته وزعلان من كم السواد فى قلبها ..
طلعوا كلهم وجهزت ابتهال العشاء وقعدوا يتكلموا ويضحكوا وقامت مرآة خالها وبناتها يروقوا المطبخ ويجهزوا الشاى ويقعدوا فى البلكونة وسمعوا صوت ام كلثوم اغنية الساعة ٩ فى إذاعة ام كلثوم وهى بتقول اروح لمين واقول يا مين ينصفنى منك ..
ناموا وصحيوا بدرى عشان يرجعوا البلد ، صمم فاروق كتير يقعدوا يومين تلاتة لكن اعتذر الخال لأن وراه اشغال لكن اخد من فاروق وعد يزوره فى البلد .. ووصلت ابتهال النادى بعد توديع خالها واسرته ودخلت المكتبة كما لو كانت داخلة محرابها الخاص ..المكان ده قدرت تلاقي نفسها وتتعرف عليها ، فى المكان ده تتجول بين الاوراق والرفوف وكأنها تجلس مع الشعراء والكتاب وتتجاذب معاهم أطراف الحديث ،
أمسكت بالاجتدة واكملت سرد احداث روايتها الاولى ، ونظرت من النافذة تفكر فى ايمن كابتن التنس ،وافتكرت أنها عاوزة تشترك فى اللعبة دى هى وابن عمتها . وقالت فرصة العب رياضة اخرج طاقتى فيها ..
ولمحت زائر يدخل عليها المكتبة وتفاجئت أن الزائر وائل .
ابتهال : اهلا يا وائل فيه حاجة حصلت
وائل : لا ماتقلقيش مفيش حاجة انا جيت اعتذر لك من اللى حصل امبارح .
ابتهال : ياخبر انت مالكش ذنب وبعدين بابا وخالو رضونى كتير .
وائل انتى طيبة ورقيقة وكل الناس بتحبك
ابتهال : كلهم ؟ لأ اكيد بس الحمد لله على الناس اللى بتحبنى
وائل مش عارف اقولك ايه ، بس انا اول مرة اتكلم فى الموضوع وكنت مش عاوز اتكلم فيه انا بقي لى سنة واحدة جواز وماينفعش اشتكى بس الحقيقة أنا مش سعيد مع ابتسام .
ابتهال : معلش يا وائل أن شاءالله ابتسام تبقي كويسة صحيا وترجع كويسة معاك ربنا يسعدكم
حاولت بكل الطرق تقفل الكلام وتمنع نفسها تسمع اى شكوى من اختها وهو يفهم أنها بالذات ماينفعش تسمع شكوى ولا يستشيرها فى حياته مع اختها ..فهم المقصود وانسحب ومشى ،
اتمشت للملعب واتفقت مع ايمن على مواعيد التمرين ورجعت المكتبة تانى ،
قبل نهاية اليوم شافت بابا وعمتها وابنها جايين عليها المكتبة ،
الله حلوة الزيارة دى .انا مبسوطة انى شفتك ياعمتو فى مكان شغلى
رحبت بهم وجت أمينة المكتبة الفترة المسائية استملت منها واتحركوا كلهم واتفقوا يتغدوا فى النادى وفهمت ابتهال أنهم جايين يتكلموا فى مشكلة ابتسام ،لكن الحقيقة هى. مش عاوزة تتكلم فى الموضوع ده ..لانه ملوش حل لا اختها هتتغير ولا امها هتحبها فى يوم من الايام وده نصيب وقدر وخلاص .
#جيهان_بركات
No comments:
Post a Comment