سامحوني

سامحنى ياابنى على جهلى

سامحنى انى اتاخرت فى القرار 

سامحنى اكتر انى أسأت الاختيار 

سامحنى ماعرفتش اصرخ وافكر

ماعرفتش اهرب واقول فرار 

سامحنى انى استمريت 

وكنت ضحية والجانى عليك

سامحنى انى اتعلقت فى الإصلاح

ونسيت ان وقت الاصلاح خلاص 

سامحنى انى اتعلقت فى امل وهمى

سامحنى كان نفسي تعيش فى حضنى

سامحنى انى زرعت فى أرض بور

سامحنى حصادى طلع حنضل وعلقم وصبار

سامحنى انى مش قادرة اسامح نفسي

انى كنت اضعف منك وماكنتش امانك

سامحنى انى سيبتك تعوم لوحدك 

سيبتك تواجه العالم لوحدك وانت فاكر

انك واقف على أرض صلبة

لاقيت نفسك طاير فى الهوا 

لا انت طايل ارض ولا طايل السما

مفيش حاجة اسمها أسرة

واب سند ودعم وحضن دافى  وحنان

سامحنى ياابنى حسبتها غلط

زى ما أسأت الاختيار واتاخرت فى القرار

سامحنى ياابنى اللى فاضل من عمرى مش كتير الوقت اتاخر للإصلاح ومابقاش فى العمر كتير

خلينى اعيش الباقي من عمرى فى سلام

اوهمنى انك بتحبنى وسامحنى والسلام 

الى حين ‏🥀

عجبتنى الجملة إلى حين 

تعطى أمل أن الحال اكيد لوقت ويتغير ،مفيش حاجة بتدوم ، مفيش اى أزمة أو أبتلاء يستمر مهما طالت المدة والسنين فى الاخر تنتهى وتخلص وتبدأ غيرها ..

حياتنا ماشية إلى حين ؟

مابين بداية اى شئ ووصوله لنقطة إلى حين بيكون سحب منك كتير اوى طاقة وامل واستنفذك بكل كيانك ولما توصل إلى حين بتكون خلاص انتهيت بمعنى الكلمة   . ووقتها تحتاج هدنة break تلتقط انفاسك وتحاول تحس ان كل شىء مر وانتهى وتستوعب كلام غصب عنك بتسمعه ماقلنالك فترة وتعدى مش قلنا لك كل حاجة إلى حين . انت كنت قلقان ومضايق ومخنوق ع الفاضى شفت كل حاجة انتهت .

محدش عايش عيشتك ولا شايل شيلتك ولا بيتألم نفس الألم ولا قلبه موجوع وجعك ومع ذلك ما أسهل الكلام وما اسهل الفتى وأنهم صح وانت كنت اوفر .

متى إلى حين ؟ طيب اتصرف ازاي. لحد ما اوصل ؟ طيب اشغل نفسي بحاجة تانية والغى فترة الانتظار ، وهل بتجدى فعلا ؟ اى شواغل باعملها بتلهينى فعلا وتخفف عنى ولما بتكون عبء اكتر وضغط اكتر لانى مش شايفة غير نقطة الوصول ...هاوصل امتى ؟ 

مريض السرطان تعذيب ألم المرض وألم العلاج ومستمر فى عملية العذاب دى لحد ما يوصل للموت وقتها كل حاجة تنتهى ، الالم والوجع واليأس والحياة والأمل أنه يمكن يخف ،وتنتهى آلام الأهل من مرض المريض ، يحسسوه طول الوقت احنا كمان بنتألم زيك . وإحساسه أنه آلامهم تنتهى مجرد ما المريض يفارق ...كل شئ ينتهى .

احنا موجودين فى الحياة إلى حين 

حين انتهاء الأجل .

🥀جيهان بركات ٢٠٢١/٨/٦ الجمعة