19

#حياتى_بديلة29

كابوس فظيع مش عارفين يصحوا منه ، محتاجين بشارة امل أن الحياة تتغير باى صورة ،

يبقي الوضع على ماهو عليه ، بدأوا يهدوا ويمارسوا حياتهم بناء على اخر الاحداث ، ابتسام فى المصحة وممنوع الزيارة كل العلاج مهدئات ونايمة معظم الوقت ، والام فى المستشفى فاقت من الغيبوبة بس أصيبت بالشلل النصفى والنطق صعب  ، والدكتور سمح لها بالخروج لكن تحت إشراف الطبيب وخصص لها ممرضة تكون معاها ، على فترات خلال اليوم للعلاج ، فاورق واخته حاولوا ينظموا مع بعض الوقت التناوب على الأم لخدمتها ورعايتها ، وائل طلق ابتسام وجهز أوراقه للسفر وجه لزيارتهم وتوديعهم ، والاب وعده يرسل له كل اسبوع رسالة فيها صورة حديثة لبنته ويكتب له اخبارها اول باول ، 

بعد ما الأمور استقرت إلى حد ما ، استأذن ايمن الاب فى الزيارة هو وأسرته لقراءة الفاتحة وتحت ميعاد الخطوبة ، وفى الوقت ده ابتهال سألته تانى ، 

ابتهال : اظن دلوقت الرؤية اتضحت أن اختى فى المصحة مش واعية لأى شئ ووائل سافر وترك مسؤلية جميلة على هتقبل تتجوزنى ومعايا طفلة مش بنتك .

ايمن : ابتسم ايمن وقالها لما نيجى انا واسرتى بكرة هتفهمى وتعرفي راىى

الاب : يا ابتهال انا عارف يابنتى انتى اتحملتى كتير اوى فوق طاقتك وتحملتى قرارات غيرك وتحملتى مسؤلية أفعالهم ، انتى مدركة تحملك لمسؤلية جميلة كويس حاولى تفكرى. انا وامك مش قاعدين كتير فى الدنيا ومش هاكون معاكى معظم الوقت ، لو مش هتقدرى بلغينى ، اكلم وائل ويتحمل مسؤليتها ويربيها بمعرفته .

ابتهال : لأ يا بابا انا متعلقة ب جميلة من أول لحظة اتولدت فيها وكنت قلقانة وخايفة وائل ياخدها منى وانا هاتحمل مسؤوليتها وانا راضية ،حتى لو ايمن مش هيوافق مش مهم ،حتى لو ما اتجوزتش خالص عشان جميلة برضه مش مهم ،انا باحبها يابابا مصيرها زى مصيرى بالظبط وانا ما عرفتش اصلح الماضي. لطفلة غير مرغوب فيها لكن فى ايدى اغير مستقبل طفلة للاسف غير مرغوب فيها ..معلش يا بابا خلينى على راحتى .

الاب : الله يبارك لك يا بنتى يصلح حالك انا هاحاول بقدر الإمكان ارضيكى واعوضك عن كل شئ ، انا مش هقدر تعيشي بعيد عنى  , انا هاجهز لك الشقة هنا تتجوزى معايا انتى شايفة كبيرة على أد ايه حتى لو هنقسمها عشان ايمن يكون براحته فى البيت المهم تكونى معايا فى البيت ، وابقي مطمن عليكى ..

ابتسمت ابتهال وشعرت اخيرا ببارقة امل ..

جه وقت الزيارة وجت الشغالة روقت الشقة وساعدت ابتهال فى ترتيب البيت لزيارة العريس ، والممرضة جهزت الأم عشان  تكون موجودة ولو دقائق ...

جه ايمن والام والاب واخ اصغر منه ، رحب فاروق بهم واتعرفوا ببعض وجت ابتهال ابتهجت الام لما شافتها واخدتها بالحضن ماشاءالله عروستك قمر ..الف مبروك يا ايمن 

ابو ايمن طلب يتكلم كلمتين قبل قراية الفاتحة والاتفاق على الطلبات 

يااستاذ فاروق احب اقولك انا ابقي عم ايمن مش والده انا اللى ربيته من لحظة والدته ، أبوه الله يرحمه مات فى حادثة وام ايمن حامل فيه ، وبعد والدته بساعات طلبت الام نتولى تربية ايمن لأنها مش هتقدر تتحمل مسؤوليته لأنها كانت مريضة قلب والدكتور حذرها من الحمل والولادة لكنها أصرت تكمل الحمل عشان والده اللى يرحمه ، ووعدتها اعتبره ابنى وأمه توفاها الله بعد اسبوع من الولادة وكنت أنا وزوجتي اعتبرناه ابننا ، والحمدلله ربنا رزقنا بعدها ب امجد اخوه وهم دول كل عزوتى وسندى فى الدنيا ...

فاروق دمعت عينيه وشعر اد ايه الناس دى كلها خير وقلبهم طيب ..ابتسمت ابتهال وفهمت ليه هو موافق على تربية جميلة ...

كملت الام الحوار وقالت ايمن حكى لنا على قصة جميلة وانا قلت له اوعى تتخلى عن خطيبتك عشان البنت يمكن جه الوقت ترد حياتك تانى فى حياة غيرك واحنا معاكى يا ابتهال نساعدك ونعينك على تربية البنت تكبر تلاقى لها كذا ام وكذا اب يابختها ...

تمت قراية الفاتحة وحددوا ميعاد الفرح على طول ، واتفق فاروق معاهم أنها هتتجوز معاه فى البيت ، واتفقوا اول شهر لجوازهم هيقضيه فى البلد مع الام لعل تغيير الجو يساعدها على الشفا ..

جريت ابتهال على الأم تبلغها بالخطوبة ، واول مرة تنطق الام قالت لها انتى مين ؟ انتى بنتى ؟ 

حضنتها ابتهال وقالت لها انا ابتهال يا ماما .

#جيهان_بركات