راحوا كلهم المستشفى دخلت ابتسام الطوارئ ، ومنها لحجرة العمليات ، ابتسام قطعت شرايينها بالسكينة ونزفت كتير ، فاروق قلبه هيوقف من الصدمة ، ووائل مرتبك جدا ومرهق عصبيا من أحداث الليلة ومش قادر يتكلم ، فات وقت والدكتور خرج وقال هى بخير وتتحجز فى اودة ، بس يا حاج لازم اعمل بلاغ لأن دى حالة انتحار ومسؤولية
جه الظابط وبدأ يسأل ووقتها فاروق سمع القصة كلها ،
وائل نام على الكنبة عشان يسيبها ترتاح صحيت نص الليل تصرخ انا فين انا فين جرى عليها أول ما شافته صوتت حاول يهديها عشان الفضايح احنا عز الليل انتى عاوزة ايه ،
ردت أيوة انت عاوز تطلقنى عشان تتجوز ابتهال انت خطبتها مش كده
رد عليها لا والله ما انا ده ايمن زميلها فى النادى .
زادت فى هياجها اكتر لا مستحيل تتجوز مستحيل ده على جثتى وجريت على المطبخ وجريت وراها ، وهى بتهدده تضربه بالسكينة حاول يهديها وهى على صرخة واحدة هاقتلك واقتلها زى ما قتلت امها ، فهمتها أن ماما فى المستشفى وهتخف قالت له انت كداب ماما ماتت وانت كمان هتموت جيت اقرب منها اخد السكينة منها جريت منى عاوزة ترمى نفسها من البلكونة ولما قربت منها امنعها قطعت شرايينها ووقفت تضحك .. كلمت عمى والجيران طلبت الإسعاف ...
بعد فحص ابتسام وفاقت جه الدكتور يتابعها ويسالها
خرج للاب وقاله يا حاج المدام لازم يشوفها طبيب نفسي لأنها عندها حالة عصبية وهتحاول تنتحر تانى ، انا طلبت الطبيب الخاص بالمستشفى وهو على وصول ...
بعد ساعة جه الطبيب وفحص الحالة وقعد معاها ربع ساعة وهى بتصرخ وتزعق ، وكتب فى التقرير تحويلها لمصحة نفسية فورا ..
ولأول مرة يبكى الاب ازاى وصلت للمرحلة دى ، الحقد والغل قلبوا كيانها للدرجة دى ، مش عارف يقول لجوز بنته ايه ! اعتذر له والا اترفق به والا احزن عشانها ..
ايه كم المصايب ورا بعضها بالشكل ده ، ده شيطان والا نفوسنا المريضة ..
صحيت ابتهال ومش لاقية ابوها ،اول حاجة جت فى بالها امها جرى لها حاجة ... لبست بسرعة وجريت على جارتها تستاذنها تاخد جميلة على ماتوصل المستشفى ، واول ما وصلت المستشفى شافت ابوها واقف بهدوم البيت هو ووائل ،جريت بسرعة ماما جرى حاجة ل ماما ، حصل ايه .
وائل طمنها وقالها ابتسام تعبانة شوية .هى مش فاهمة حاجة ، حصل ايه خد يفهمني
وهى بتسال اسئلة كتير ومحدش بيفهمها خرجت ابتسام بالتروللى عشان تركب عربية الإسعاف ،اول ما شافتها جريت عليها مالك يااختى فيكى ايه شافت ايديها ملفوفة بالشاش وقربت منها تطبطب عليها ، اول ما شافتها ابتسام ضربتها بالقلم ، انزعج الاب واخد ابتهال فى حضنه يطيب خاطرها ، هى بس نفسها تفهم ، ابتهال بتردد حصل ايه حصل ايه مالها اختى ..
اشفق عليها وائل هى يتتكلم بقلب اخت خايفة على اختها قلب كله حب ورحمة قلقانة على اخت قلبها كله حقد وسواد ...
وائل اتحرك مع العربية للمصحة عشان يكمل إجراءات المستشفى ويطمن على مراته ...
#جيهان_بركات
No comments:
Post a Comment