الام حاولت بكل قوتها أنها تنهى الخناق والزعيق ده على اد ماتقدر ، ودخلت على ابتسام اتكلموا شوية والام خرجت قعدت تراضى فاروق وتعتذر على تصرفهم مع ابتهال كان لازم يبلغوها أنهم مش هيقدروا يرجعوا ياخدوا جميلة
الاب سمع الكلام وساكت حاسس بمنتهى الاشمئزاز ، ازاى يغلطوا ومش بيعترفوا بالخطأ وكمان يتعاملوا عادى بعد الجرح والوجع ، مصدوم فى كل شئ حواليه هى كانت أخلاقهم كده من زمان والا حصل حاجة أظهرت كل حاجة جواهم .... قعدت ابتسام فى اودتها وصامتة مش بتتكلم وجميلة بتصرخ تدخل الام تجيبها ومش عارفة تسكتها البنت على صرخة واحدة ومش عارفة تتصرف ، مستكبرة تنادى على ابتهال لكن الاب يقول لابتهال معلش يا بنتى هاتى جميلة امها قلبها حجر هاتيها بتسكت معاكى ، فعلا ابتهال تروح تاخد البنت وتضمها فى حضنها وتسكت جميلة محتاجة امان محتاجة حضن حب وحنان ، ابتهال شايفة أن جميلة هتعيش نفس حياتها مرفوضة ومنبوذة ايا كان السبب ، حضنها وقالت لها تقريبا يا بنتى هتكملى حياتك معايا ... جه وائل على الغدا واتكلم أن ابتسام لازم ترجع البيت ، سكتت ابتسام وقت الغدا مش عاوزة حد يزعجها تانى ، انتظرت لما الغدا خلص والليل مسي ووائل منتظر تجهز ، جت ابتسام قالت له مش جاية النهاردة .
وقبل مايرد مشيت .احرجته أدام الكل واضطر ينزل ، قعد على القهوة يفكر هى دى الحياة الزوجية الهادية كلها حب ومودة ، فين ياابتسام كلامك فين الوعد اننا نكون سعداء ، والا انا اتفرضت عليكى ، طيب لو كده هنكمل ازاى وانتى بالاخلاق دى والغطرسة دى ، انا عاوز اعيش مرتاح .
تانى يوم كانت وردية ابتهال مسائية وبلغت باباها اعمل ايه يا بابا ؟ طمنها وقالها خليكى فى اودتك ولو حصل حاجة كلمينى احنا مش هينفع نتهرب ،اكيد فى لحظة مواجهه وانا عارف انها معندهاش مقدرة على المواجهه وبتتعامل مع المواقف بعدائية شديدة وانا عاوز. افهم ليه كل ده ؟ مش مسألة تفرقة فى المعاملة بس اكيد فيه سبب تانى .
الصبح بابا نزل بعد ما فطر ووصى ابتهال تتصل .
يادوب بابا نزل ودى خرجت من اودتها جرى على ابتهال وجت تقفل الباب خبطت الباب بعنف وابتهال اتخضت ،
ابتهال : فيه ايه ؟ انتى فاكرة نفسك فين ؟ مالك ؟ والا اقولك ابعدى عنى
ابتسام : ابعد عنك ده ايه ؟ عاوزنى ابعد واسيبك تخططى وتدبرى وتهدمى بيتى ،
ابتهال : اهدم بيتك ؟ انا ؟ انتى اكيد اتجننتى
ابتسام : أيوة اتجننت لما الاقى اختى بترسم على جوزى عشان تاخده منى ! الاعيبك دى اخرتها ايه .
ابتهال : اخرسي انتى خلاص عقلك راح اطلعى بره .
الام انتى بتقولى ايه تعالى هنا انتى اكيد فاهمة غلط . تعالى بس نتكلم
ابتسام : اطلعى انتى بره وماتتدخليش
الام : عيب يابنتى تكلمينى كده
ابتسام : ابعدى عنى لازم الاقى حل واواجه السوسة دى قلبها اسود وكلك حقد ، بتشاغليه من ورايا انتى فاكره نفسك ايه مفيش منك .
جريت ابتهال على التليفون جريت وراها وهى بتصوت انتى عاوزة تضربينى بالتليفون ياحقودة الام تحاول تسكتها وتقلل الغضب لكن مفيش فايدة الام ضغطها بيزيد وجريت ورا ابتسام عشان ماتتشابكش معاها وتضربها لكن التشابك كان صعب والام صرخت وصوتت ولسه هتمسك ايد ابتسام قبل ما تضرب ابتهال بالتليفون الضربة جت على دماغها اغمى عليها ، خافت ابتسام وجريت على جارتهم الحقينى يا طنط ماما وقعت الحقينى ..
جريت الجارة وشافت المنظر اتخضت وابتهال جنبها يا ماما ياماما فوقى حد يطلب الإسعاف بسرعة ...
وهم فى الهيصة دى ابتسام مشيت ، جارتهم اتصلت ب فاروق تعالى بسرعة على المستشفى .نزلت ابتهال مع امها فى عربية الإسعاف والجارة اخدت جميلة لما دورت على ابتسام لاقاتها اختفت .
فاروق قابلهم وهو مذهول ايه اللى حصل تعالى يا بنتى احكى لى فيه ايه ، ؟ حكت له على كل حاجة ، استشاط غضب خلاص مش هقدر استحملها اكتر من كده .
الدكتور اسعفها ودخلت العناية المركزة بعد تحاليل وأشعة وقالهم هننتظر .
ابتهال هديت شوية بس زعلانة على امها ،
على الجانب الآخر راحت ابتسام ل جوزها وكلها غضب وقالت له : طلقنى .
وائل : ده ايه ده ؟ مالك يا ابتسام فيه ست تطلب الطلاق بعد الولادة .
عندك بنتك خدها انا مش عاوزاها ، انا كنت كده كده هاطلب الطلاق عشان ابتهال ماتنفعش تتجوزك بعدى
وائل ياخبر اسود انتى مريضة والله مريضة . ولما انتى مش عاوزانى اتجوزتينى ليه
ابتسام : اسال نفسك ؟ الخاطبة جت تقولنا جنابك جاى تخطب مين !
وائل : أيوة فاكر الخاطبة قالت لى على ابتهال وقالت لى مناسبة لك .
ابتسام : ايووووة وانا قلت للخاطبة أنها مخطوبة لابن عمتها ، وانا مستعدة
وائل : يعنى محدش غصب عليكى يبقي ليه بقي
ابتسام : انت فعلا غبي اتجوزتك عشان ماتتجوزش ابتهال ، جنابك معجب ولهان زى اللى قبلك كل عريس يجى لها هى ليه بقي انا وحشة ، كفاية بقي ..
وائل : انا مش قادر اصدق ايه السواد ده كله .
ابتسام : السواد ده اللى شفته شوية ..طلقنى وخد بنتك وورينى هتتجوز ابتهال بقي ازاى وتربوا بنتك سوا .
وائل : لاحول ولاقوة الا بالله العلي العظيم.
#جيهان_بركات 🥀
No comments:
Post a Comment