فى نفس ليلة السبوع واستضافة فاروق الخال وأسرته وقضوا ليلة سعيدة ، فى نفس الليلة خناقة كبيرة سمعها كل سكان العمارة ، حاولت كتير ام ابتسام تتفادى الفضايح ،لكن ابتسام كانت شايطة على الاخر ،ومش طايقة حد يوجهها ،وخصوصا لما وائل أتدخل يدافع عن ابتهال ، احساس فظيع تملكها أنها مهما عملت الناس بتحب ابتهال وتدافع عنها وهى فشلت فشل ذريع أنها تخلى الناس تحبها أو تتعاطف معاها على الأقل ، بس وائل كان شايف كتير وكاتم ومش قادر يسكت ، كان نفسه يتجوز ويعيش زى ابوه وامه حياة هادية فيها سكن ومودة ، عاوز يتهنى مع مراته ، عاوز يخلف ويكون عنده عيال كتير مش مهم بنات والا صبيان المهم يكون عنده عيلة كبيرة ، لكن اتصدم شخصية ابتسام مش شخصية بنت فى العشرين رقيقة وطيبة لكن عدائية وماتقبلش حد يقولها لأ مهما حصل ، تحب تكون متفردة فى الاهتمام ، كل همها تكون محور الكون لجوزها ،ومن غير ما تقدم اى عطاء من ناحيتها ، تاخد كل حاجة عافية مع أنه يقدمها لها طبيعى وبالاصول ،ده مش بيرضيها اللى يرضيها تاخدها بالعافية والغصب .، اتصدم أنها مش متقبلة بنتها نهائى ورافضة تشيلها وتراعيها ، عاوزة أمها تلف حوالين نفسها طول الوقت ، شافت فى السبوع أن كل الموجودين بيرحبوا ب ابتهال ويدعو لها عقبالك ، أن ابتهال تضايف الناس وتلعب مع العيال وتوزع عليهم السبوع وهى راضية ومرتاحة ، أن نظرات الاب لابتهال بحب وود زاد السواد فى قلبها ، ومع كل الأحداث اللى حصلت لسه جواها غضب وطلع على وائل وهو بيكلمها بهدوء مايصحش اللى عملتيه وازاى تطردى اختك وابوكى من بيتى ، هى سمعت الكلمة دى واتجننت اكتر وقامت الخناقة ،جريت الام تقفل شيش وشباك عشان محدش يسمع لكن للأسف ابتسام تعمدت تصرخ وتصوت بصوت عالى عشان الجيران تسمع ، وزادت فى الغضب واهانت جوزها فكان التصرف الطبيعى أنه ضربها بالقلم ومسك ايديها انتى تخرسي خالص لو كان اهلك نسيوا يعلموكى ازاى تتكلمى مع جوزك أعلمك انا .
الام وقفت مذهولة بقي ده وائل الطيب الحنون ليه كده بس يا ابنى
بص لها وهو مندهش جدا انتى للدرجة دى مش شايفة بنتك بتغلط .انتى السبب فى سوء اخلاقها .
فضل سهران فى البلكونة لحد الفجر نزل يصلى الفجر فى المسجد وفضل قاعد يقرا قران بعد الفجر لمحه الاب ومارضيش يقطع عليه خلوته ...انتظره لما يخلص ..
وائل قام وحط المصحف فى المكتبة ، واتفاجئ بعمه واقف خلفه ، يادوب لسه هيسلم عليه وائل اترمى فى حضنه ،
الاب : لا اله الا الله مالك يا ابنى فيك ايه أهدى طيب
قعدوا بره الجامع على القهوة وحكى له كل إللى حصل وهو مستاء من نفسه أن مراته تستفزه لدرجة أنه يمد أيده عليها وهو زعلان من نفسه أنه عمل كده .
الاب : والله ابنى يمكن لو كنت أنا ضربتها من زمان ما كانتش وصلت للمرحلة دى . أهدى يا ابنى وكل شئ يتحل باذن الله .
تعالى نفطر سوا زمان ابتهال صحيت نفطر سوا الدنيا الجمعة نقعد مع بعض وننزل نصلى الجمعة سوا .
راح فاروق ووائل اشتروا الفطار ووصلوا البيت كانت ابتهال منتظرة والدها فى البلكونة . جهزت الفطار وفطروا فى جو عائلى بين كلام وضحك وصوت الراديو فى البرنامج العام إلى ربات البيوت .. سرح وائل وقال كان نفسي فى الجو ده ..
طبطب عليه فاروق وقاله ربنا يصلح الحال .
قامت ابتهال قعدت فى اودتها ووائل وفاروق قاعدين فى الانتريه وفجأة وائل نام . فاروق فى هدوء جاب غطا وقال يسيبه ينام شوية لسه فيه وقت طويل على صلاة الجمعة .
#جيهان_بركات 🥀
No comments:
Post a Comment