اتفقت مع ابن عمتها على تمرين التنس ، هو وجوده بالنسبة لها دعم لأنها خايفة تعمل حاجة نفسها تعملها ،عاشت عمر بحاله خايفة ، خايفة من رد فعل ماما ، خايفة من الأوهام اللى زرعتها فيها ، خايفة من كلام الناس والعيب والميصحش ، زرعت جواها الخوف عشان تلغى مشاعرها وتفكيرها ،تلغى الاحساس بالحرية جواها ، عشان عمرها ماتفكر تتحرر منها بالنسبة لها الضحية اللى تخرج فيها كل مساؤها وكلاكيعها ، وياما بنشوف أهل كتير سواء اب او ام دمروا عيالهم بسوء المعاملة والتنصل من المسؤلية تجاهم ...
الاب فاهم بنته كويس وقالها انا هاجى اتفرج عليكى ولو فيه اشتراك هادفع لك الاشتراك الشهر ده تجربي ، وعاوزك تشوفي نفسك فى كل لعبة ..
ابتهال : حبيبي يا بابا ربنا مايحرمنى منك ، انا بس محتاجة تريننج اتمرن به مش هينفع اتمرن بالفساتين والجيبات ..
الاب : عينى لك يالا بينا اجيب لك انتى وابن عمتك كمان ، مش عاوزة ياختى اجيب لك تريننج
ضحكت العمة وقالت أيوة وانا كمان جت على.
قضوا وقت لطيف ولما بقت ابتهال وأبوها موجودين لوحدهم حكت له على وائل ورد فعلها ، طبطب عليها وطمنها ..
فى الناحية التانية ابتسام وامها بيخططوا ويدبروا ومش على بال حد الاعيبهم ..
رجعوا البيت بابا وابتهال بيشوفوا هيعملوا ايه بكرة ..شوية وجت ابتسام وامها بمنتهى البساطة ..
ابتسام : حقك على يابابا انا جيت اعتذر لك واعتذر ل ابتهال انت عارف انا تعبانة اد ايه وماكانش قصدى ، سكت الاب وقالها ادخلى لأختك اعتذرى لها .
فتحت الباب على ابتهال من غير ماتخبط وفزعتها .وارتبكت اول ما شافتها واسترجعت آلام ماضى كتير كانت بتدخل الدخلة دى وتخضها وتقولها انا جاية اشوفك بتعملى ايه من ورانا وتحسسها أنها بتعمل شئ شائن ،، ابتسام عملت كده كعادتها وعشان تثبت نفس المخاوف منها .
ابتهال كان فى أيدها كتاب ولما دخلت عليها اتفزعت وخبت الكتاب تحت المخدة .. يادوب دخلت من الباب .
ابتسام : بتعملى ايه مش تيجى ترحبى بينا وتعملى لنا العشاء تعالى شوفى جميلة مش وحشاكى والا ايه ،
ساد صمت دقيقة وابتهال مش لاقية رد كل اللى فى دماغها انتى جاية تتعاملى معايا عادى ولا كأن حاجة حصلت والمفترض انى اكمل التمثيلية دى .فكان أبلغ رد الصمت .
كملت ابتسام الحوار المقنع جواه سخرية واستهزاء بمشاعر اختها . ولم تعى أن ابوها واقف وراها بيتفرج ..من شدة سواد قلبها .
ابتسام : مالك عاملة كده ليه ، ورينى بتعملى ايه مخليكى مكسوفة من نفسك ، ماتقومى ياللا هو انا هافضل منتظرة جمال خطوتك .
الاب : هو ده الاعتذار .
اتفزعت ابتسام ومش عارفة ترد
يابابا انا اعتذرت لها وهى مش عاوزة ترد على فقلت اهزر معاها
الاب : كدابة انا واقف من ساعة ما فتحت عليها بابا اودتها من غير استئذان .
ابتسام : هو انت بتراقبنى يابابا خايف عليها منى للدرجة دى هى اهم منى ، بتكرهنى كده ليه ، محدش بيحبنى محدش طايقنى والدموع نزلت والاب وابتهال محدش فيهم اتحرك ولا نطق .
خرجت بسرعة للصالة لحضن ماما تكمل المشهد .
دخل الاب على ابتهال وقالها ماتزعليش انا فاهم أن دى تمثيلية بس مش فاهم وراها ايه .اعتذارها مش صادق وحاسس أن فيه مصيبة .خليكى مكانك اوعى تخرجى وأعملى حسابك حياتك هتمشى زى ما هى فاهمة ..اقفلى ورايا الباب .
كل ده وابتهال مش قادرة تتكلم... وجود ابتسام وقف الزمن ، كأنها رجعت بالزمن للخلف ووقعت فى نفس البئر تانى .
#جيهان_بركات 🥀
No comments:
Post a Comment