رجعوا البيت ولم كل حاجة فى شنط ونزل هو وابتهال واخدوا تاكسي لعمتها هى ساكنة قريب منهم فى المعادى بس محتاجة تاكسي .
رحبت بهم واستقبلتهم وقعد الاب واخته على جنب وحكى لها كل التفاصيل ،قالت له ماتشليش هم الاكل عندى كل يوم ولا يهمك انا هاطبخ لك ياخويا كل يوم وتنورونى تتغدوا معايا انا وابنى انت عارف احنا لوحدنا ، قعدت ابتهال مع حازم يحكوا لبعض اخبار الشغل والأحلام والطموح وحكت له على لعبة التنس بتفكر تشترك فيها ، سكت شوية وقالها تصدقى أنها لعبة حلوة كنت بالعبها وانا صغير ، انت هتشجعينى ارجع العبها تانى ، واتفقوا يتقابلوا فى النادى لما تكون ورديتها مسائيه ويقابل كابتن ايمن كابتن التنس ..
ونزلوا الاب وابتهال وقالها تعالى نتمشى على الكورنيش الجو حلو اوى دلوقت
وهم بيتمشوا سمعوا صوت جاى من النيل اغنية ام كلثوم سهران لوحدى ...صياد قاعد فى مركبه ومشغل ام كلثوم ،،الاب سرح مع الاغنية وسكت وكأنه سافر لعالم تانى ،، شعرت ابتهال أنه سارح مع نفسه واستمتعت بدندنته مع الاغنية ،
وسألته سؤال وانتبه أنه فى أرض الواقع .
ابتهال : انت بتحب ام كلثوم يا بابا
الاب : مين مش بيحبها.
ابتهال : بس انت بتحب الأغنية والا الأحداث اللى حصلت وقت الأغنية .
الاب :( بص لها بانتباه ) ايه الكلام الكبير ده .
ابتهال : انت حبيت يابابا قبل كده
خرجت منه الآآه من جوة قلبه ، آآآآآه واى حب حب عمره ماهيتكرر ولا يحصل لى تانى
ابتهال : ياه يابابا أنت موجوع اوى احكى لى بقي .
الاب : كانت بنت الجيران كان فيها جمال رباني وحياء محلى جمالها وبهاءها ، خجولة وتحمر خدودها اول ما حد يكلمها ، اول ما اسمع اسمها قلبي يطب وضربات قلبي تزيد ، كانت تقعد فى الشباك وتسرح فى القمر وهى بتسمع سهران لوحدى ، وانا باشوفها كل يوم وحافظ كل تفاصيلها تلبس ايه وامتى ،بتحب تسمع اغانى ايه وتحب الصيف والا الشتا ، كل شباب الحى كان هيموت عليها ، ولما كانت تبص لى وعينها تيجى فى عينى كنت ادوب وابقي فى قمة سعادتى واتباهى كده وسط اصحابي بصت لى مين أدى ..
ابتهال : ياحبيبي يابابا اول مره اعرف ان الحب كده ...حصل ايه يا بابا انت ليه ما اتجوزتهاش،
الاب : النصيب بقي كل شئ نصيب .
ابتهال : لا بجد حصل ايه .
الاب : حاجة بسيطة حد سبقنى واهلها وافقوا عليه واتجوزت .
ابتهال : وانت يعنى اتاخرت ..وسبب التأخير ايه ؟
الاب : لا اتاخرت ولا حاجة كنت طالب فى الجامعة وهى فى ثانوى وعمرى ما تخيلت أنها تتجوز صغيرة اوى كده ..انا انهارت وتعبت ومرضت كتير وسافرت البلد عند اخوالى قعدت شهور الصيف كلها لحد ماتعافيت ، ولما رجعت لاقيت جدتك الله يرحمها بقي خطبت لى امك .
ابتهال : هههههههههههه ياعينى يا بابا معلش خيرها فى غيرها .
الاب : ياللا الحمدلله ..ياللا نرجع نكمل الأغنية فى البيت .
#جيهان_بركات🥀
No comments:
Post a Comment