ليلة طويلة وصعبة جدا ، مشاعر كتير مختلطة ،واحداث صعبة تكدر ، وائل شاف أسوأ ليلة فى حياته ، يشوف مراته عصبية جدا لدرجة أنها تنتحر ، شاف منظر الدم واتلخبط ، عمره ما كان يتصور أن دى الحياة الزوجية ، هو ده الحلم ده بقي كابوس مش عارف يصحى منه ،
الاب قلبه انخلع على بنته خاف تموت وتروح منه ، فى أسبوع مراته وبنته كتير عليه يقدر يتحمله ، ليه كل ده ، ازاى المصايب تتهاوى عليه واحدة ورا التانية ، ماقدرش يتماسك وبكى ، بكى كتير وهو ساجد مليش غيرك يارب نجينى ونجى اسرتى من الكرب .
أما ابتهال مسكينة حاسة أنها السبب فى كل ده ، أنها مرفوضة من امها واختها واتسببت فى تدميرهم ، للاسف تأثيرهم عليها مازال ممتد ، ابتهال محتاجة وقفة تفكر وتقرر حياتها الجاية عاملة ايه ، محتاجة تكسر قبضان سجن العقد النفسية فى الماضى ، لكن انتبهت أن قلبها كله خير وحب ، مش زى اختها يبقي كله هيتصلح
حضنت جميلة وقالت لها ياحبيبتى انتى مسكينة مالكيش ذنب ، وانا كمان مليش ذنب ، شكلنا هنستمر مع بعض ، تقريبا مصيرنا مرتبط ببعض ...
ابتهال فى اودتها والاب فى اودته كل واحد انفرد بنفسه
اخدت جميلة فى حضنها وقالت تستريح لحد ميعاد الشغل ماينفعش تفضل قاعدة فى البيت هتنهار اكتر ..محتاجة تخرج فى الهوا هى والبنت ...
خبطت على بابا وقالت له انها نازلة ، خرج من الاودة طبطب عليها وقالها بالسلامة حاولى ما تفكريش ولو تحبي سيبي جميلة اكلم عمتك تيجى تاخدها ..
قالت له لأ يا بابا جميلة من نصيبي من النهاردة .
نزلت ابتهال والاب اتصل بالعمة عشان تيجى واتصل باخوه وقاله على اللى حصل كله وقاله انا جاى .
وكانت سهرة عائلية ، بعد ساعات جه وائل وهو محبط ومكتئب وحزين جدا ، وقاله
:ياعمى انا جيت تشاركنى فى التفكير لانى مش عارف افكر لوحدى ولا أقرر ..المرحلة الجاية محتاجة قرارات مصيرية كتير .
قاطعه الاب : يا ابنى أنا موافق انك تطلقها هى ماتنفعش تكون زوجة على الأقل بحد ماتخلص علاج ، وامها الله اعلم بها محدش عارف هتقوم امتى بالسلامة .
وائل : وجميلة يا عمى
الاب : استاذنك تسيبها لنا وتعالى اى وقت تشوفها .
وائل : انا ياعمى قررت اسافر الامارات اشتغل هناك وابعد عن البلد
الاب : يبقي خير أن جميلة عندنا .
وائل : انا اسف ياعمى انا حبيت العيلة دى وكان نفسي اكون فرد منها
الاب : انت مننا ياابنى انت ابو حفيدتى وهتفضل لك وجود فى وسطنا حتى لو اتجوزت واحدة تانية هتفضل مننا برضه .
قام وائل وحضنه انت يا عمى نعم الاب كان نفسي بجد حياتنا تكون ماشية ببساطة اكتر من كده ...
الاب : كل شئ نصيب يا ابنى ، النهاردة نرتاح كلنا وبكرة نرتب الأمور اكتر من كده .
ارتاح وائل للقرار ده لانه مش مرتاح مع ابتسام من اول ليلة وهو بيعشم نفسه أنها بكرة تتعدل بكرة تتعود على وعلى البيت والجواز واتصدم لما كرهت جميلة من قبل ماتشوفها.
ابتهال طول فترة الشغل قاعدة فى المكتبة تبكى ،جواها شحنة كبيرة كم من الصدمات ورا بعضها محتاجة هدنة .محتاجة طاقة نور تشوف بها اللى جاى ايه ...
فى اخر اليوم مر عليها ايمن يطيب خاطرها ويسمعها ، كانت محرجة منه ومش عارفة تقوله ايه .
فهمها أنه عرف كل اللى حصل لأختها وأنه معاها مهما حصل ، استغربت جدا
بس انت ذنبك ايه تتجوز واحدة تربي بنت مش بنتها ..
ايمن : انا متقبل ده ماتخافيش انا عاوزك انتى والعيلة كلها ، انا منتظر تطمنوا على والدتك واجيب أهلى وتتم الخطوبة باذن الله ..اطمنى
#جيهان_بركات
No comments:
Post a Comment