رجع العم البلد وهو سعيد بخطوبة ابتهال ظنا منه أن بالخطوبة دى مخاوف ابتسام انتهت ،وان مفيش مشكلة خلاص والأمور ترجع طبيعية .
اول ما ابتسام شافت عمها اتعصبت ازاى يسيبها ويسافر حاول يهديها انا جبت لك خبر حلو اوى يخليكى تهدى وترجعى لجوزك ..ابتهال اتخطبت .
ابتسام هاجت وماجت اكتر من الاول وفضلت تصرخ وتزعق تتخطب لأ مستحيل ازاى ماينفعش تتجوز ، لأ لأ وفضلت تصرخ ومحدش عارف يسكتها ، العم قال لابنه أجرى على حكيم الصحة هاته بسرعة ، وحاولوا يسكتوها مفيش والناس اتلمت وافتكروا فى حالة وفاة ، جه حكيم الصحة وبالعافية عرف يعطيها حقنة مهدئة وقاله لازم تروح المستشفى ، بعد ما نامت اتصل ب فاروق وحكى له اللى حصل وقاله لازم تاخدها من هنا محدش عارف ممكن تعمل ايه ، فاروق بقي مستاء جدا لكم الفضايح مسبباها بنته ، وشايف أن الموضوع ده لازم له وقفة كفاية قلقه على مراته ومسؤولية طفلة رضيعة أمها مش عاوزاها وبنته ابتهال ملهاش ذنب تشيل كل الهم ده لوحدها ... فى المستشفى وقت زيارة الام اتجمعوا كلهم العمة وابتهال ووائل وأيمن وفاروق اطمنوا على الأم الدكتور قالهم لسه فى الغيبوبة ، واتحركوا كلهم وطلب فاروق يتكلم مع وائل على جنب وحكى له الموضوع كله فقاله خلاص يا عمى اجيب عربية ونروح نجيبها من البلد ..برغم انى زعلان جدا وحقى كزوج ازاى تسافر من غير ما تقولى من غير ما اعرف
فاروق : عندك حق يا ابنى ، بس صدقنى الموقف دلوقت اصعب من كل ده ابتسام حالتها بتسوء وانا مش فاهم ليه كل ده وعملت مصايب كتير فى وقت احنا مش فاضيين لافعالها دى .
وائل : ماكنتش فاكر أنها عاوزة الناس كلها تهتم بها لوحدها يوصل للدرجة دى وبجد يا عمى تعبت مش هو ده الاستقرار والاسرة ، بنتى باشوفها احيانا ومش معايا زوجة تحترم وجودى ،ومحتار هى عاوزة منى ايه ،
فاروق : هنحاول نحل كل الامور تعالى نشوف عربية بينا وبين البلد ساعة زمن تعالى نجيب ابتسام ونلاقى حل ..
وائل : الف مبروك لابتهال ياعمى ربنا يتمم بخير ..
وصلوا البلد ورحبت بهم مرآة العم ودخلوا على ابتسام يحاولوا يصحوها مدروخة على الاخر ومش واعية هى فين ..صمموا يمشوا على طول قبل ما تاثير الحقنة المهدئة ما يروح ...
وصلوا بالليل بيت وائل وفاروق قاله هافضل معاك لحد ما ابتهال ترجع من شغلها ، وكل ده وابتسام نايمة .. فاروق افتكر كده أنها هديت والليلة هتمر فى سلام استأذن ومشى .
جت ابتهال ومعاها جميلة وفاروق رجع ووقت العشا بيتكلموا ، وحكى لها على ابتسام وتصرفها ،
ابتهال : نفسي اعرف يا بابا هى بتكرهنى ليه ، ماحصلش انى اخدت منها حاجة ولا ماما كانت بتفضلنى عليها بالعكس أنا مهملة من صغرى وماكنتش فاهمة أن ده إهمال لكن مع الوقت فهمت أنها بتفضل ابتسام على ورضيت بالأمر الواقع وسكت .
الاب : ياريتك يا بنتى ما سكتى وكنت فهمتينى ، عمرى ما كنت موجود وشفت ده كانت بتتعامل معاكى إدامى كويس مااعرفش فى غيابي بتعمل ايه ، واجى الاقيكى قاعدة لوحدك تقولى شوف ابتهال منطوية وقاعدة لوحدها من بدرى نقولها تعالى اقعدى معانا ترفض ...
ابتهال : منطوية ؟ دى كانت بتزعق لى وتقفل على الاودة وتقولى مش عاوزة اسمع صوتك ولا اشوفك .
الاب : لاحول ولاقوة الا بالله العلي العظيم..ربنا يشفيها ويخرجها من المستشفى على خير ..لازم نلاقى حل .
دخلوا ناموا صحى فى نص الليل فاروق مفزوع على صوت التليفون ، اللهم اجعله خير سمع وائل الحقنى ياعمى ابتسام انتحرت ...
الاب : ياخبر اسود أنا جاى لك حالا ..
نزل زى ما هو من غير ما يصحى ابتهال وجرى على وائل لقى عربية الإسعاف واقفة تحت والمسعفين نزلين ب ابتسام على النقالة ووراهم وائل ياللا ياعمى على المستشفى بسرعة .
#جيهان_بركات 🥀
No comments:
Post a Comment