رفيق العمر

رفيق العمر
هى : الله شفتيهم قاعدين مع بعض ازاى
صاحبتها : هم مين دول
هى الرجل والست الكبار دول ماشاءالله شكلهم يشرح القلب
صاحبتها هم فين ..اه شفتهم مالهم بقي
هى قاعدين يضحكوا ويتكلموا ويمسك أيدها ويطبطب عليها
صاحبتها يااا انتى مركزة معاهم بقي كل ده اخدتى بالك منها
هى أيوة يابنتى انا لفتوا نظرى من ساعتين وكل ما لبث عليهم الاقى مشاعر حلوة بينهم
صاحبتها انتى اول مرة تشوفيهم
هى لا شفتهم قبل كده كتير عشان كده متابعاهم اد ايه راجل طيب وجميل بيعاملها حلو تخيلى انتى بقي كان بينهم ايه السنين الا فاتت لما يوصلوا للمرحلة دلوقت الله عليهم .
صاحبتها : انتى تقصدى يعنى أن كان بينهم حسن عشرة ولما وصلوا للخمسينات مثلا هيوصلوا للمرحلة اللى انتى شايفاها دى صح
هى أيوة صح كده اكيد بينهم حب ومودة ورحمة وحسن عشرة مروا بابتلاءاات كتير وخرجوا منها متمسكين ببعض اكتر من الاول .الله عليهم
صاحبتها هههههههههههه هههههههههههه مش قادرة امسك نفسي الصراحة
هى انتى بتضحكى على ايه بجد مش فاهماكى
صاحبتها: باضحك على السيناريو اللى شغال فى مخك لوحدك فيلم ابيض واسود ملوش حل .
هى : فيلم ايه يابنتى ما انتى شايفاهم اهه هو انا باتخيل اهه شوفى ماشيين ادامك اهه ماسك ايديها وهى مبتسمة وتمام اهه
صاحبتها : طيب أهدى شوية الزوجين دول اعرفهم من زمان الراجل ده مش عارفة اقولها لك ازاى ..بس هقولك الست دى الزوجة الرابعة بالنسبة له
هى: يامصيبتى .
صاحبتها : اصبرى بس صوتى بعدين والست ده الراجل ده الزوج التانى بالنسبة لها لأن الاولانى طلع عينها وعين اللى خلفوها وخرجها من الشقة بعد ما اخد منها فلوسها ودهبها وعيالها ورماها فى الشارع
هى : يامصيبة سودة ايه اللى بتقوليه ده
صاحبتها : اللى سمعتيه هو بيتجوز كتير عشان ينبسط وشاف انها لقطة لانها مش عاوزة غير مأوى وحد يصرف عليها بيحقق لها ده مقابل أنه ينسبط وهى كمان لما حقق لها أدنى طلباتها مبسوطة أنه مهتم بها مفيش ادامها غير أنها تسعده هى مش محتاجة اكتر من كده ..فهمتى بطلى بقي ترسمى سيناريوهات الدنيا بتتغير والناس بتتغير ومفيش حاجة بتفضل على حالها
حسن العشرة مش بطول السنين ولا كتر مواقف ممكن شهر وايام تخلى فيه حسن عشرة وده يكفى للحياة .واد ايه هى قصيرة عشان نحيا الحياة صح .