ارجو منك تنشرى رسالتى لزوجى لعله يقرأها وهو لايعلم من كتبها ..
زوجى الحبيب ..
مر عشرين سنة على آخر مرة كتبت لك فيها رسالة وانا فكرت بعد ماقرات بوست على الفيسبوك اننا نقرب من بعض من خلال الرسائل عشان ندوب الجليد ال بينا ...كتبت ورق كتير بس ولا واحد كملته لكن المرة دى اختلفت
عملت بالنصيحة وقلت اكتب لك حديث الذكريات عشان نحرك المشاعر ...فاكر لما كنت ياكلمك فى الموبايل اسال عنك عشان اتاخرت وانت اعتذرت عشان نسيت تكلمنى تقولى انك هتتاخر وقتها خجلت من نفسي انى زعلت منك ، ،، طب فاكر يوم لما عملت الشقة كلها تنضيف وبذلت جهد انى لازم اجهز الغدا عشان تيجى من الشغل وتعرف تتغدى وقتها بوست ايدى وقلت لى تسلم ايديكى تعبتك معايا وصممت تعمل الشاى وانا استريح فى السرير وصممت اوعدك انى مااعملش كده تانى وقتها كل التعب راح انك طيبت خاطرى ،،، طب فاكر لما كنا فى العربية وراجعين من عند مامتك وانا كنت زعلانة إن مامتك واخواتك عاملونى وحش وباحكى لك فى العربية وخرجت عن شعورى وزعقت وطلبت منك انزل من العربية ووقفت وركنت على جنب وانا مشيت على رجلى وانا متعصبة وعمالة اعيط لاقيتك بتمد ايدك بمنديل ويتقولى امسحى دموعك انا اسف حقك على كان لازم اخد بالى واحافظ على مشاعرك ومااسمحش حد يزعلك كبرت فى نظرى اوى وقدرتك جدا ووقتها قلت انا هاستحمل الدنيا كلها عشان خاطرك ،،،فاكر يوم البرقوق لما قلت لك انا باحي البرقوق اوى بس للاسف مش باشتريه مع الفاكهة والخضار عشان غالى وخصوصا محدش بيحبه الا انا ..يومها نزلت وجيت كيلو برقوق وغسلته وجهزت طبق فاكهة معتبر وجهزت قاعدة فى البلكونة واخدتنى وانت بتقول انا عازمك على قعدة وخروجة وكنت طايرة من السعادة عشان انت انسان رقيق وحنون 🤫
انت اكيد مستغرب صح بس مش مستغربنى انت مستغرب الأحداث ..عشان ابقي صافية حاولت انسى ماعرفتش فقلت احسن حاجة اغير الموقف بموقف احسن منه تخيلت كل موقف يحصل ازاى وغيرته بالشئ ال احبه ويعجبنى وعلى كده كل موقف يخلص اليوم وانا متنكدة قبل ماانام اغير النهاية وانام مرتاحة وتانى يوم اتعامل معاك ولاكأن حصل حاجة ،،، وعشان كده انت دلوقت طيب وحنين ومفيش احسن منك فى الدنيا انت سندى وامانى
زوجتك الحبيبة
No comments:
Post a Comment