#إعادة السيناريو
# الحلقة 39 _ جابت اخرها
آية بقى عندها لامبالاة وتناحة ملحوظة
تنام كتير تنام فى اى وقت وعلى اى وضع ،،يعنى ممكن تنام وهى قاعدة وهى بتتفرج على التليفزيون وهى ماسكة الموبايل وطبعا وهى تقرأ من المصحف ..مع اول صفحة تنام على روحها
سرحانه ،طول. الوقت الاحساس بالندم والحسرة أهلكها ليه اتجوزته ليه استمريت معاه ليه انا ضعيفة ليه ماعرفتش اقول لأ ليه ما وقفتش ادامه ،مئات من ليه ومفيش إجابة ولما ماتعرفش الإجابة عقلها يتوقف عن التفكير. وتنام وهى مش عارفة تعمل ايه عشان تتخلص من الشعور ده
العجز وقلة الحيلة
نهى على طول تكلمها ورفضت تحكى لها على حياتها عشان ماتشيلش مشكلة جديدة نهى بعد عشرين سنة جوزها راجل محترم جه فى يوم طلب منها يتكلموا وقالها ببساطة شديدة انا باحترمك وباقدرك واسف ماعرفتش احبك الحب اللى تستحقيه .وانا هاتجوز حبيبتى الاولانية فرقت بينا السنين بس لما ظروفها سمحت قررت اتجوزها وانا اسف عشان هاعمل كده ولكى مطلق الحرية لو عاوزة تكملى معايا أو تاخدى حريتك وكل حقوقك هتاخديها وهافضل اصرف على ولادى لحد ما يكونوا فى بيوتهم بس ارجوكى ماتزعليش منى
نهى تقبلت الموضوع لانه كان محترم معاها جدا وكان بيعاملها احسن معاملة بس دايما عندها احساس انها مش فى قلبه والحياة
بقت بينهم روتينية ومملة كتير ،
لو حكت الكلام ده ل آية هتتقهر اكتر عشان جوزها بيذلها وسايبها معلقة ...
التناحة زادت واهملت نفسها وحياتها ، اخدتها نهى لطبيب تانى وشرحت له كل حاجة قالها اللى عندك تبلد عاطفى نتيجة صدمة شديدة اتعرضت لها .وده سبب لك اكتئاب شديد ،
كتب لها على دوا وطلب منها تكف عن لوم نفسها وقالها كلام فى منتهى الخطورة اول مرة تسمعه
قالها جوزك مريض نفسي ولازم تبعدى عنه لأنه طول ما انت فى حياته هيدمرك لأنه بيستمد طاقته منك ، فى علم النفس يعتبر من مصاصى الطاقة كل ما يلاقي وقفتى على رجلك يسيبك تظبطى نفسك واول ما تطمنى انك تمام ينقض عليكى ويفترسك يمص طاقتك ويحطمك ومش بيستريح الا لما يكسرك ويتلذذ بآلامك ويبتسم لما تبكى ويسيبك خلاص هو حقق طلبه
زى ما يكون بكلامه فتح طاقه فى عقلها قالت فعلا هو بيعمل كده وبدأت تستعيد ذكريات كتير سيئة تفنطها وتحللها ولأول مرة تحس ان الظلام انتهى والدنيا نورت من حواليها
كانت بتقول ل نهى اول مرة اشوف الدنيا حلوة وكل حاجة حوالى جميلة
ردت نهى عشان فرض عليكى تشوفى الدنيا من خلاله وتشوفى إللى هو عاوزة بس وتفكرى بدماغه هو واوعى تحسي وتشعرى وتتألمى وتفرحى الا من خلاله ...
النور دخل روحها.و عقلها والرؤية اتضحت اكتر ..والمرة دى قرار بلا عودة
كان قرار اخدته من زمان بس منتظرة هو ينفذه والشخص المريض زى حسام مش هياخد الخطوة دى ..وهى منتظرة ربنا يبعده عنها لكن ربنا بيساعد اللى عاوز يساعد نفسه لابد من خطوة السعى والبذل لازم نبذل مجهود ونخطى خطوات كتير عشان نعبر ونعدى من عنق الزجاجة
لما فهمت ده قالت سبحانك يارب ازاى مااخدتش فى بالى ..للدرجة دى كانت مسيطر على .فعلا الطبيب قالها كده .ضحية الشخصية دى مستحيل تعرف تفكر وتقرر وتنتظر منه أن هو اللى يبعد ويرحل
واتفقت مع الدكتور على خطوات كتير هتمشى مع بعض
تروح المحامى وترفع قضية للخلع .
وتقبل اى وظيفة فى طريقها
وتبعد اخبارها عن كل المحبطين حواليها وتقفل بابها على نفسها حتى عيالها بلاش تشركهم وينفذوا كلامه ويشعروها بالذنب
وتواظب على الدوا لحد ما تحس أنه غيرت مسار حياتها ومشيت فى الطريق للخروج من عنق الزجاجة
عزمت وتوكلت وقررت وخلاص اخدت أول خطوة لما راحت محكمة الأسرة ، الموضوع كان صعب عليها اوى اوى مش سهلة الخطوة الخوف المرضى وأنها فريسة مستهلكة كانت خطوة صعبة جدا صمدت لآخر اليوم وفى قيام الليل انهارت وبكت بكاء حار من قلبها أن ربنا يسامحها أنها وافقت تستهلك وتتهان وتتهدر كرامتها خوف منه اكتر من خوفها من ربنا ..
No comments:
Post a Comment