إعادة السيناريو 23
كتابة المشهد عند آية كان بالنسبة لها متنفس قوى جدا عندها من غيره ممكن تموت من القهر ....تطور معاها الكتابة انها تكتب اللى حصل وتكتب لو اتعاد المشهد يكون رد فعلها ايه ..والردود اللى كانت بتقف فى حلقها مايتعرفش تقولها ..والا الجملة اللى ماعرفتش تكملها لأنه بيلاحقها بالاتهامات وأنها كدابة ..ويسخر منها وبقولها أيوة أيوة كتاب الحجج صفحة الأعذار ...
والا انها تتعلم تدافع عن نفسها وماتسمحش يضربها وترد أيده عنها ...
والا انها تتحصن من المفاجآت المؤسفة ويباغتها يضرب مبرح وبعدين يتخانق وتفضل شهور مش فاهمة ليه تفضل تفكر لازم اخد موقف وتاخد موقف وتجاهد عشان تستمر فيه متخيلة أن الموقف إثر فيه لكن اليأس اللى بيصدره لها بتجاهله لموقفها وتصرفه معاها على أن مفيش حاجة حصلت وأنها بيتهيألها وأنها مريضة نفسيا وعندها خيالات ...الأساليب كتير انها تنزل على مفيش وتلاقى نفسها تضرب رأسها فى الحيط ...
الاسلوب ده سبب لها فوبيا الاماكن المقفولة ...
و فوبيا من الصوت العالى ...و فوبيا من الضلمة ...
مش ممكن يسيبها تخرج من اى مناقشة معاه محاولة منها لاستعادة كرامتها وانسانيتها وتقعد تتكلم معاه عشان تلاقى حل لازم تخرج من المناقشة عياط بانهيار ويقابلها بابتسامة المنتصر لأنه وصل لمراده ...وهو تحطيمها ...
وتقف من تانى بعد ما وقعها فى سابع ارض ويهملها لحد ما تستعيد نشاطها وحيويتها وتدور على شغف جديد وحياة جديدة تنعشها وقتها يرجع تانى يمتص طاقتها ويحبطها ويوقعها على جدور رقبتها
وهى دى حياة آية .
No comments:
Post a Comment