#ست كوم .بداية جديدة
الزوج : السلام عليكم .
الزوجة : عليكم السلام .خير جيت بدرى يعنى حصل حاجة
الزوج : ايوة فعلا عاوزة اتكلم معاكى فى موضوع مهم
الزوجة : ياخبر يبقي اتجوزت علي
الزوج : لأ ياستى
الزوجة : يبقي ناوى تتجوز .
الزوج : لاوالله .ياستى اهدى شوية .تعالى بس وانا هافهمك
الزوجة : اتفضل اتكلم
الزوج : لا مش كده ..عاوزك تلبسى حاجة حلوة كده واقعدى فى الفراندة على مااعمل الشاى واحصلك
الزوجة : اللهم اجعله خير كمان شاى يارب استر
الزوج : اتفضلى الشاى وادى كيك وادى قعدة
الزوجة : ياااه من زمان ماقعدناش فى الفراندة بس خير
الزوج : خير ان شاء الله ..انا هاتكلم فى موضوع شاغلنى من فترة ولما اكتملت فى الفكرة قلت لازم اتناقش فيها معاكى والفكرة دى ان شاء الله ان شاء الله تكون سبب سعادتنا .فاكرة زميلتنا ال زوجها مات من شهر وجيتى معايا نعزيها
الزوجة : ايوة فاكراها طبعا صعبت على اوى
الزوج: ايووة الست دى كلامها عن زوجها صحى فى حاجات كتير اهمها ياترى لو انا مت مراتى هتتكلم عنى كده وفضلت افتكر ذكريات كتير بينى وبينك خفت .خفت اوى .
وفى نفس الوقت ده كنت باحضر الدورة الخاصة بالشغل وقدرا كان فى نفس المكان دورة عن الاسرة واحتياجات الزوج والزوجة ومشكلة منتصف العمر .حضرتها كلها وقعدت فى الدكتور المحاضر وفهمت منه حاجات كتير قلت سبحان الله ربنا بصرنى انى اسمع الكلام ده اكيد لحكمة والافكار كانت بتجيب بعضها وقررت ان حياتنا تتغير مش حياتى بس زمايلى كانوا بيقولوا اتجوز وابدا من جديد لكن اكتشفت انه غلط لانى نفس الشخص ال ماعرفش يسعد نفسه ولايسعد زوجته هابدا مع واحدة تانية مستحيل اسعدها ..ولاهاسعد نفسي واكون طبعا اخجل اتراجع واقول انا غلطت ...المهم محتاجين بداية جديدة مع بعض ومش هاقولك اننا نحاول لو فشلنا هيحصل كذا .لأ هاقولك هنحاول ونحاول ونحاول عشان ننجح ان شاء الله ..
الزوجة : بداية جديدة ! اظن هتقولى انسى ال فات ونفتح صفحة جديدة ووعود تانى وامل تانى .وارجع اغنى اسكت بقي كفاياك كلام عن حبنا
الزوج : ههههههه يانها ابيض انتى بتحبى الاغنية دى وبتسمعيها كتير عشان كده .اتاري تسمعيها وتعيطى ...ياااااه ده انا طعلت وحش اوى
الزوجة: لا سيدى مش قصدى
الزوج : انا هاقولك الخطة ال قالها لى المدرب فى المحاضرة عشان بداية صح يبقي احنا الاتنين وعشان تبقي صفحة جديدة بيضا لازم نزيل التراكمات بينا نصفى نفوسنا وندى فرصة لمشاعرنا تتجدد احنا كبرنا وعيالنا اتجوزوا وبقينا فى مرحلة منتصف العمر .اوعدك تكون المرحلة الملكية لكى نقضى فيها احلى عمر وتكون فيها ذكريات حلوة لعيالنا ويارب يارب نكون من اهل الجنة ...انا هابدا انى تبت الى الله ورجعت الى الله واستغفرك ربي واتوب اليك من كل ذنب اذنبه ومن كل تقصير قصرت فيه لهذه السيدة .وانوى يارب انى اسعدها ماتبقي من عمرى وهذا خالص لوجهك الكريم
الزوجة : اللهم آمين ..كلامك حلو ومطمنى ربنا يرضى عنك
الزوج : الله ياست الكل ....شوفى ياستى دول ورق وقلمين انا قلم وانتى قلم واكتبى كل موقف ترك قى نفسك اثر سئ وانا مصمم على ده لانى عارف اى موقف بيحصل بتجيبى الشريط من الاول وتتكوم الاخطاء كلها .وخصوصا انى مش باعتذر
الزوجة : دى حقيقة واقعد اكلم نفسى وارد عليك جوة نفسي مع كل موقف من ايامنا الاولى والاقينى مش طايقة
الزوج : ماانا فهمت ده واعتبر انى فهمت متاخر ..واوعدك انى هاتكلم معاكى فى موقف موقف ومش هاقفل الموضوع الا وانتى راضية ومسامحة اتفقنا .
الزوجة : اتفقنا ..ياااه كلمة حلوة اتفقنا ..
الزوج : وانا كمان هاكتب وارجوكى لاتخافى ولاتخبى انا هاتقبل كل كلمة تكتبيها وهنصفى نفوسنا وان شاء الله بداية جديدة ونعيش المرحلة الملكية سوا
الزوجة :ربنا يرضى عنك ولايحرمنى
منك .
#بقلم #جيهان بركات 💞
No comments:
Post a Comment