#قطيعة.تقطع ...
قطيعة تقطع 2
الأمور خرجت عن السيطرة ..رجعت كلمتها عادى وهى تجاوبت عادى لا اتكلمنا فى سبب الخصام ولا تعاتبنا وقلت فى نفسي .خلاص هى كفاية عليها كده واتعلمت من الدرس ...لما اتكلم معاها ترد يادوب على الأد ...كانت الاول مانمتش الا لما ارجع دلوقت ارجع الاقيها نايمة ...كانت ماتعرفش تنام الا وانا جنبها دلوقت تنام فى اى مكان حتى لو على كنبة الانترية ...كانت سهرتها معايا نتكلم ونهزر وحكايات بينا كتير وناكل الحاجات الحلوة اللى يتعملها ...سهرتها مع الافلام والمسلسلات ...
كان لها ضجيج فى الشقة ..دلوقت صمت رهيب ..
كنت باحس بوجودها فى كل ركن التليفزيون شغال وهى بتسمع حاجة تانية فى المطبخ وبتغنى معاها ...مش حاسس بوجودها ...
بينا طلبات وإجابة للطلب ...انا مقفول من ناحيتها من التبلد اللى هى فيه ...نتكلم اسبوع واتعصب عليها. واقاطعها تانى شهر شهرين وده بقي أسلوب حياتنا ...وهى مش فارق معاها ...كتير وانا مع اصحابي باسال نفسي انا باعمل معاها كده ليه ...مش عارف بصراحة ...يمكن مضايقنى قوتها يمكن نفسي اشوفها منهارة .لأ مش كده .انا مش عارف. اسيطر عليها عاوزها طوعى تحت امرى ويمكن هى كده فعلا بس انا مش شايف ..كنت فاكر رد فعلها غير. كده وده معصبنى اكتر ..
جيت فى يوم من ايام المقاطعة اتفقت مع اصحابي نروح رحلة كلنا واصحابي صمموا يجيبوا زوجاتهم وقلت وماله ...رجعت البيت حضرت شنطتى ومشيت من غير مااقولها ولا اقول كلمة وقفت فى الصالة وما نطقتش بكلمة ...ونزلت وسافرت مع اصحابي واستغربوا انى جاى من غيرها وقضيت خمس ايام اتفسح واتصور وانزل صور على الانستجرام ومش مهم عندى تشوف الصور والا لا ولما تشوفها تتضايق .قلت وسيلة للضغط عليها ...بعد اول يوم اتصلت ببنتى اطمن عليهم واعرف أخبارهم واهم حاجة اخبار مراتى بعد ماتشوف الصور ...اتفاجئت انها حذفت الانستجرام من الموبايل خالص بصراحة اتغاظت اوى ..ووقتها بنتى فهمت ليه هى حذفت الانستجرام برغم أنها بتتابع حاجات كتير بتحبها عليه ..
الموضوع غاظنى لدرجة انى قضيت باقي ايام الرحلة وانا مش مظبوط واصحابي افتكروا انى مش مبسوط من غيرها ...استنكرت كتير بس الصراحة ....
اه مش مبسوط من غيرها ...
مش عارف اخرتها ايه اللى انا باعمله فيها ...باقاطعها كتير وتقريبا اتعودت على عدم وجودى ...
بقلم 📝 جيهان بركات 🌺
No comments:
Post a Comment