#كلمتين _على جنب
موضوع محيرنى وشاغلنى شوية ...انك تكون مثلا قلبك صاف واجتماعى بتعرف تتعرف على الناس بسهولة ونلاقى مثلا حد معين كل محاولاتك معاه تبوء بالفشل دماغك تقفل وتقول أنا محدش يتقبلنى
أو تلاقى نفسك ناس محددة مش قادرة تبلعك ولا طايقة وجودك تشك فى نفسك وتقول هو انا قلت ايه والا عملت ايه .هو انا حقود والا دمى تقيل وتبدأ مئات من الأسئلة
هاقولك ببساطة شديدة أن الأرواح بتتآلف مع اللى شبها يعنى لو ناس بتحبك وانت انسان لطيف ونيتك سليمة وقلبك نقى وانت ادرى حد بنفسك مش معنى ان حد مش قادر يتقبلك أنه نموذج ده معناه أن روحه مش متقابلة مع روحك ..انتوا الاتنين متنافرين ومش معناها أنه وحش أو سئ لأ مش شرط لكن ارواحكم لاتتلاقى
فانت ايه بقي كف عن محاولاتك للتودد ليه لأنك هتحبط من محاولاته لصدك والابتعاد عنك ...
والصدمة بقي أن الأرواح المتآلفة والمتنافرة مش شرط اصحاب أو زملا أو جيران
ده ممكن بينكم صلة رحم أو صلة دم او نسب
الكارثة ابنك او بنتك وتقول فى نفسك هو ليه كده بيعاملنى ليه كده ...هو انا أساءت التربية والا أساءت فى حبي لهم
الفكرة كلها أن ارواحكم مش ماشية مع بعضها
ممكن تلاقى بنتك تحب ام صاحبتها اكتر منك او تحب خالتها أو عمتها مش مسألة حب كحب لان مفيش بديل للأم لو الاب لكن ترتاح فى الكلام مع حد من القرايب اكتر منك سواء ابوها أو امها
ونفس الشئ للشاب ممكن يرتاح فى الكلام مع حماته أو حماه ويسمع كلامه وياخد رايه اكتر من أهله .
والام والاب يبقوا يضربوا كف بكف هو احنا خلاص ملناش قيمة
لأ لكم قيمة ولكم تقدير بس هو مش شايف. مش عارف يوازن لان ارواحكم لا تتآلف مع بعضها .
مش عارفة كلامى صح والا لأ اهى تخاريف اخر الليل
بقلم جيهان بركات 🥀
No comments:
Post a Comment