مفيش مساحة

#كلمتين _على جنب 

#مفيش مساحة 

هو : انتى لسه زعلانة 

هى : لا ابدا 

هو : لكى حق تزعلى بس معلش 

هى : معلش ؟ هى كلمات الاعتذار اتغيرت والا ايه ؟ بس انا مش زعلانة 

هو : ازاى بس الموقف كان صعب والكلام كان غبى 

هى : ماتاخدش فى بالك .

هو : انا مش فاهمك بجد .انتى ازاى كده 

هى : أوعى تفتتكرنى جبلة من غير احساس 

هو : انا مستغربك الصراحة .الكلام اللى أتوجه لك يضايق وخصوصا أن مفيش اعتذار عن اللى حصل وانتى واخدة الموضوع ببساطة .

هى : لأ طبعا مش ببساطة خالص زى ما انت متصور الفكرة مش كده .

هو :  فهمين. طيب عشان قربت اتجنن .

هى : الفكرة انى معنديش مساحة للزعل

هو : عندك حق انا عارف انك مشغولة وعندك حاجات كتير شغلاكى 

هى : لأ خالص مش ده قصدى المقصود معنديش مساحة ازعل فيها لان معنديش ملى فى فاضى من غير زعل ولا تجريح ولا ألم بس هى دى الفكرة

هو : ياخبر اسود كلامك خطير وبتقوليه ببساطة أشد وجع انتى ازاى كده 

هى : ازى الصحة .

هو : بجد انتى ازاى الموضوع بسيط كده 

هى : انا باحكيه ببساطة لكنه مش بسيط وصعب والاصعب منه انى باتظاهر انى بخير وانى عادية لان الآخرين بيجرحوا عادى وبعدها يكلمونى عادى ، ويتعاملوا معايا كأنى بزراير اضغط عليه اكون الشكل اللى هم عاوزينه محدش بيفكر انا ايه وعاوزة ايه بيشكلونى على هواهم ..تعبت انى أوضح وجهة نظرى تعبت انى ابرر تصرفاتى تعبت انى اترجم كلامى عشان بيتفهم غلط .تعبت انى أظهر نيتى عشان باتهم حتى بسوء النية ..مابقاش فى حيل للمعافرة والمناهدة ، احسن حل ريحنى اسيب كل واحد يعمل اللى هو عاوزة ويفهم فى اللى على مزاجه ، ويتهمونى اى اتهامات عجباهم ويحكموا على حتى لو بالاعدام ولا فارقة مابقاش فى مساحة ازعل فيها من حد مش لاقية فى ملى سليم من غير ألم ولا جرح كل ده عشان كنت حريصة على ارضاءهم عشان بس يفضلوا فى حياتى واكتشفت بعد سنين انى اصلا مش فى حياتهم ..وباعتذر لنفسي سوء فهمى وتاخرى فى الفهم .

هو : يااااااه كلامك وجعنى اوى ومش عارف اعتذر لك ازاى واخفف عنك ازاى .

هى : زى ماقلت لك ماتاخدش فى بالك .انا مستريحة فى وضعى الحالى 

هو : اللى هو ايه ؟

هى : كل واحد حطنى فى مكان انا بالتزم به وبافضل على وضعى يعنى اللى حطنى على الهامش بافضل على الهامش حتى لو كان هو جوة قلبي باغصب على قلبي واستمر على الوضع اللى حطنى فيه ..

هو : ولما عملتى كده لاقيت ايه 

هى : لاقيت العجب  الصراحة ..ناس كتير كان لهم مكانة خاصة عندى اكتشفت ايه بقي منهم حطنى على الرف ومنهم حطنى على الهامش ومنهم حطنى على دكة الاحتياط باكون موجودة فى وقت الفراغ وفيه اللى مش شايفنى اصلا وفيه اللى موقفنى على خط الحدود والاحلى بقي اللى حطنى فى التلاجة ده اللى لذيذ اوى فاكرينى ايس كريم تقريبا 

هو: هههههههههههه هم يبكى وهم يضحك .وازاى كده 

هى : يعنى محتفظ بى لحين إشعار آخر .

هو : وجهة نظر غريبة بس طالما مرتاحة خلاص .

هى : مش مسألة راحة بقدر ماهى أن مفيش مساحة 

بقلم 📝 جيهان بركات 🌺