ضيفة شرف

اعتبرى نفسك ضيفة شرف على الدنيا ،احنا موحودين شوية وماشيين طالت المدة أو قصرت قاعدين شوية ، ضيف الشرف ده بيشارك بمشهد ،مش بطل قصتهم لكن انتى بطلت قصتك انتى ..

ضيف الشرف ده لا له حقوق ولا عليه واجبات اتعامل مع اقرب الناس لكى كده ، وقتها هتكونى خفيفة عليهم ،وعلى قدر حبك لهم بلاش تاخدى مقابل للحب ده ...

بلاش يحسوا منك انك بتلزميهم برعايتك أو الاهتمام بكى ، مشاعرك بتوصل لهم حتى لو ما اتكلمتيش حتى لو مش بتطالبي وتلومى التقصير لكن بيوصل لهم انك منتظراهم انك بتتوقعى منهم ، 

انتى مش لوحدك فى حياتهم ، حياتهم فيها ناس تانية الصالح والطالح وعلى قدر قوتهم أو هشاشتهم بيتكون سلوكهم ناحيتك ، ومهما اتكلمتى وعبرتى عن مشاعرك هم مش محتاجين يعرفوا لانهم عارفين ومتاكدين أنهم مقصرين ناحيتك بس التأثير السام من أحدهم بيطغى على إحساسهم بالبر والتعبير عن حبهم لكى ..

وزى ما قلت لك مفيش مفر ، ومفيش مساحة للإصلاح اتركى كل شئ واستغنى عن كل شىء ، عيشى حياتك يوم بيوم ماتشغليش بالك بكرة فيه ايه ، لانك مش عارفة بكرة جاى والا لأ ف بلاش تضيعى اللحظة النهاردة وانتى قلقانة من وقت مش بتاعك ..

حياتك هتتغير بكى انتى ،ما كانش لكى يد فى اقدارك السابقة ولا لكى يد فى اقدارك الجاية . 

عيشى ك ضيفة شرف هترتاحى ويرتاح بالك ..انتى مش ضيفة شرف فى حياة ولادك بس لأ انتى ضيفة شرف على الدنيا كلها .