طنط ماما 10

#طنط ماما ,10

هدى رتبت أمورها وظبطت مع ام مازن من غير ما حد يعرف وسافرت لوحدها ل نهلة كانت هاتتجنن عشان تطير لابنها ، هى زى نهلة موجوعة من تصرفات زوج غير. مسؤل 

كل همها ترد لها الجميل وتقف جنبها وهى بتولد وتاخد ابنها فى حضنها وتستقر ..

فاتت ساعات طويلة كأنها شهور وهى قلقانة وعاوزة توصل باى شكل قبل ماجد عشان ترتب كل شئ ، جت لها كذا مكالمة وكلها متربطة ببعض ، وقلقها مش هيهدى الا لما تيجى مكالمة محددة منتظراها من بدرى ..

واخيرا اتصل ...ماجد راح البيت عند هدى كالعادة من غير ما يتصل واما خبط على الباب محدش فتح ..نزلت جارتها قالت له دى سافرت بس مش عارفة فين ...

زعق جامد ازاى وليه وفين وازاى الجارة اتفزعت نزل له جارهم فيه ايه ما تتكلم بالراحة احنا مش خدامين عندك اتفضل امشى من هنا .

خاف ماجد ونزل جرى ولما وصل لاول. الشارع اتصل ب هدى كان عصبية راحت وغضبه قل .قالها سافرتى فين 

: سافرت ل نهلة اجيب ابنى 

: ماقلتيش ليه نسافر سوا انا جهزت نفسي وجبت شنطتى وعديت عليكى نسافر مع بعض حتى الظابط جاى معانا 

: قبل ماتيجى تمضى على ورقة عند الظابط انك مش هتاخد ابنى منى تانى .

: انا موافق تاخديه 

: متاسفة انا مش مطمنة لك لازم تمضى ورق رسمى والورقة مع الظابط امضيها هتيجى معاه مش هتمضى مش هتشوفنى ولا تشوف ابنك والمولود اللى جاى تانى واعمل اللى انت عاوزة وضيع مستقبلك وعمرك وانت بتدور علينا هاروح اعيش مع نهلة وولادك 

: ليه بتعملوا فى كده ؟ انتى ازاى بقيتى بالقسوة دى 

: قسوة ؟ دى قسوة دى تيجى ايه جنب غدرك وقسوتك واهانتك لى وضربك لى من غير سبب .انا كده رحيمة بك جدا

:.......    ............

: انا منتظرة تليفونك والظابط منتظرك تمضى تيجى مفيش امضاء مفيش عيالك .

قفلت السكة وقعدت تبكى الإنسان الحنون الطيب صعب عليه يقسي ...ده مش طبعها ولا من اخلاقها المساومة لكن مضطرة ، هى الظروف قهرتها وضغطت عليها وعاشت سنة محرومة من ابنها ماتعرفش عنه حاجة ولا بتشوفه بيكبر ادام عينها حرمها من سبب واتطلقت من غير سبب وجه الوقت تقول كفاية .

الوقت ده جه لما ملكت القدرة على اتخاذ القرار والقدرة على تنفيذه وقتها بس عرفت تقول كفاية وتنال حريتها .

بقلم  جيهان بركات 🌸