لازم تقولها

هى : انت هتمشي امتى
هو :بتسالى ليه ماانا قاعد معاكى اهه
هى :عاوزة اعرف هتسيبنى وتمشي امتى ابقي مراتك وحقي فيه جزء من يومك
هو : احنا اتفقنا على كده لما اتجوزنا وانتى وافقتى ان مراتى مش هتعرف ومسؤليتى انى اجى لك واظن ماحصلش انى اتخليت عنك .
هى :-ايوة اتفقنا بس تعبت
هو :- تعبتى من ايه مش فاهم انا كل مااروح فى مشوار اعدى عليكى بطلت اخرج معاها عشان اجى لك اروح اعزى اروح بسرعة واجى لك مش ده اللى حصل امبارح هو فيه عزا لنص الليل ...مش كنت عندك ورجعت لها نص الليل وهى ساكتة ولا بتتكلم.
هى : كمان عاوزة تتكلم انا مراتك زيها بالظبط ولى حقوق
هو : انا قصرت ؟ اهلك عارفين واصحابك وجيرانك وباجى لك فى الاسبوع كل يومين عاوزة ايه تانى ...انا اتجوزت تانى عشان انبسط مش عشان تنكدى على
هى :انا بانكد عليك انا مليش غير طلب واحد لازم تقولها
هو :ليه اقولها ليه ؟..عصبتينى وضايقتينى هى مضايقاكى فى  ايه ..
هى : مااعرفش بقي لازم تقولها وخلاص مش هاستريح الا لما تقولها ..من حقي
هو : لا مش من حقك ..انا بس اللى عندك هى لا ملكيش دعوة بها ماتنسيش الحكاية دى انتى اللى دخيلة عليها انتى اخدتينى منها يبقي ترضي بحالك وتسكتى .
هى :- دخيلة انا دخيلة هو انا خرابة بيوت وخطفتك منها
هو : ايوة امال انتى فاكرة نفسك ايه انتى زوجة تانية وكمان جاية على حقوقها وعاوزة تنغصي عليها ..انا المسؤل وباعرف اوازن بينكم باكدب عليها عشان مااجرحهاش باتاخر عليها وكتير اسيبها قاعدة لوحدها عشان اقعد معاكى انتى واكتر من مرة اتجاهلها وهى مريضة وبدل مااوديها للدكتور اجى لك واقعد معاكى يااااه ده انا راجل مااستاهلش اول مرة اخد بالى من اللى باعمله فيها عشانك وانتى كل همك لازم اقولها
هى : لازم تقولها لازم تقولها مليش دعوة لازم تقولها ..
هو :انا هاروح استسمحها واعتذر لها واراضيها من الان لاخر يوم فى عمرى واطلب منها تسامحنى انى عملت فيها كده ...
هى :نععععم هى دى اخرتها
هو : اكبر غلطة ارتكبتها انى اتجوزتك .